Day: June 20, 2015

ನನ್ನವಳು

ಅವಳೇ ಅವಳು ನನ್ನವಳು
ಎದೆಯ ಹಾಡಿಗೆ ಸಾಲಾದವಳು

ಕಣ್ಣ ರೆಪ್ಪೆ ಅವಳು
ಕಂಡ ಕನಸು ಅವಳು
ಜೀವದ ಉಸಿರು ಅವಳು
ಉಸಿರಿಗೆ ಹೆಸರಾದವಳು..

ಅವಳೇ ಅವಳು ನನ್ನವಳು
ಮನದ ಪುಟಕೆ ಸಹಿಯಾದವಳು

ಎದೆಯ ಕಡಲಿವಳು
ಕಡಲ ಅಲೆ ಇವಳು
ಅಲೆಯ ನಾದ ಇವಳು
ಎಂದೂ ಮರೆಯದ ಹಾಡಿವಳು

ಅವಳೇ ಅವಳು ನನ್ನವಳು
ಎದೆಯ ಹಾಡಿಗೆ ಸಾಲಾದವಳು!

ಮೌನ ಹನಿಗಳು – ೨

ಈ ಜಗತ್ತು
ಒಂದು ಕ್ಷಣ ಮೌನವಾಗಲಿ
ಆ ಮೌನ ಪದವಾಗಲಿ
ಪದ ಹದವಾಗಲಿ
ಸೋಲಿರದ ಸಾಲಾಗಲಿ
ತ್ರಾಸಿರದ ಪ್ರಾಸವಿರಲಿ
ಪದಗಳಿಗೆ ಜೀವಬಂದು
ಹೊಸಭಾವ ತಂದು
ಕವಿತೆಯಾಗಲಿ
ಈ ಜಗತ್ತು
ಕವಿತೆಯಾಗಲಿ!
ಒಂದುಕ್ಷಣ ಮೌನವಾಗಲಿ !

ಮೌನ ಹನಿಗಳು – ೧

ಮೌನವೇ ಮೌನವೇ ಮಾತಾಡು
ಮೌನದಿ ಕೇಳು ಮೌನ ಬರೆದ ಹಾಡು!
ಮೌನಗಳ ಮಿಲನದಲಿ
ಮಾತು ಹುಟ್ಟಿತೇ
ಮಾತಿನಿಂದಲೇ ಮೌನ
ಅಸುನೀಗಿತೆ ?

ಮಾತು ಮೌನವಾದಾಗ
ಮೌನ ಮಾತಾದಾಗ
ಕವಿತೆ ಹುಟ್ಟಿತೇ ?
ಹದವಿರದ ಪದಗಳಲಿ
ಕವಿತೆ ಪ್ರಾಣಬಿಟ್ಟಿತೇ