Author: Vinaykumar

ನನ್ನ ಕಾಡುವ ವಿಚಾರಗಳನ್ನು ಪದಗಳಲಿ ಸೆರೆಹಿಡಿಯುವ ಪ್ರಯತ್ನದಲ್ಲಿ ಇದ್ದೇನೆ. "ಎನ್ನ ತೊದಲು ನುಡಿಗಳು" ಮತ್ತು "ಭಾವಶರಧಿ " ಎಂಬ ಹೆಸರಿನ ಎರಡು ಕವನ ಸಂಕಲನ ಬಿಡುಗಡೆ ಕೂಡ ಮಾಡಿದ್ದೇನೆ. ಕನ್ನಡ ಸಾಹಿತ್ಯ ಸೇವೆಗೆ ಕಹಳೆ ಎಂಬ ಪುಟ್ಟ ಸಂಸ್ಥೆ ಪ್ರೀತಿಯಿಂದ ನಡೆಸುತ್ತಿದ್ದೇನೆ ನನ್ನ ಬ್ಲಾಗ್ ಓದಿದಕ್ಕೆ ಹಾಗೂ ನಿಮ್ಮ ಪ್ರೋತ್ಸಾಹಕ್ಕೆ ಧನ್ಯವಾದಗಳು..

ನೀ ಮುಗುಳುನಗುವಾಗ

ನೀ ಮುಗುಳುನಗುವಾಗ
ಹಾಲಿನ ಕಡಲಿನಂತಿರುವ
ನಿನ್ನ ಕೆನ್ನೆಯ ಮೇಲೆ
ಅಲೆಗಳು ಮೂಡಿದಂತಿದೆ…
ಬೆಳದಿಂಗಳಿಗಿಂತ ಬೆಳ್ಳಗಿರುವ
ನಿನ್ನ ಕಣ್ಣಿನ ಹೊಳಪಿನ ನಡುವೆ
ನಕ್ಷತ್ರದಂತೆ ನಿನ್ನ ಬಿಂದಿ ಹೊಳೆಯುತ್ತಿದೆ..
ಮಾತು ಮತ್ತು ಮೌನ ಅದ್ಯಾರೋ ಮಿಶ್ರಣ ಮಾಡಿ
ನಿನ್ನ ತುಟಿಗೆ ಲೇಪಿಸದಂತಿದೆ..
ಸುಯ್ಯನೆ ಬೀಸುವ ಗಾಳಿಗೆ
ಮಕ್ಕಳು ಉಯ್ಯಾಲೆ ಜೀಕುವಂತೆ
ನಿನ್ನ ಕಿವಿಯೊಲೆ ತೂಗಿದಂತಿದೆ.

ಮುಂಜಾನೆಯ ತಿಳಿ ಸಲ್ಲಾಪಗಳು – ನಂದಿ ಬೆಟ್ಟದಲ್ಲಿ ಕಂಡಿದ್ದು !

ನಿದ್ದೆ ಗೆಟ್ಟಿರುವ ಕಣ್ಣುಗಳು ಸುತ್ತಲೂ ಹಾಲಿನ ಕೆನೆಯಂತೆ ಹರಡಿಕೊಂಡಿರುವ
ಮುಂಜಾನೆ ಮಂಜಿನೊಳಗೆ ತೂರಿಕೊಂಡು ಬರಲಿರುವ ಸೂರ್ಯನ ಕಿರಣಗಳನ್ನೇ ಕಾಯುತ್ತಿವೆ!.

ಆ ಸಿಹಿ ತಂಗಾಳಿಗೆ ನಡುಗುವ ಮೈಮನಗಳು ಒಬ್ಬರೊಬ್ಬರನ್ನು ಅಪ್ಪಿಕೊಂಡು ಜೊತೆಗೆ ತಂದಿದ್ದ ಶಾಲಿಗಿಂತ ಹೆಚ್ಚು ಬೆಚ್ಚನೆಯ ಭಾವಕ್ಕೆ ತೃಪ್ತಗೊಂಡಿವೆ.
ಸೆಲ್ಫಿಗೆಂದೇ ಖರೀದಿ ಮಾಡಿದ ಮೊಬೈಲುಗಳಲ್ಲಿ ಹೊಸ ಹೊಸ ಪೋಸುಗಳದ್ದೇ ಸದ್ದು..! EMI ನಲ್ಲಿ ತಂದ  ಹೈ ಎಂಡ್ ಕ್ಯಾಮೆರಾಗಳಲ್ಲಿ ಸೂರ್ಯನ ಉದಯದ ಮಜಲುಗಳು ದಾಖಲಾಗಿವೆ. ಒಂದು ತಾಸಿನಿಂದ ಅದೇ ಜಾಗದಲ್ಲಿ ಕಾದು ಕ್ಲಿಕಿಸಿದ ಒಂದು ಫೋಟೋಗೆ ಕ್ಯಾಮರಾಮ್ಯಾನ್ ಖುಷಿಪಟ್ಟು ಅಲ್ಲಿಂದ ನಿರ್ಗಮಿಸುತ್ತಿದ್ದಾನೆ

ಅಪ್ಪನ ಕೈಯಲ್ಲಿದ್ದ ಹೊಸ ಆಟಿಕೆ ಕದ್ದು ಮಗು ಓಡತೊಡಗಿದೆ.
ಅಮ್ಮನಿಗೆ ಅವನು ಎಲ್ಲಿ ಬೀಳುತ್ತಾನೋ ಅನ್ನೋವುದೇ ಚಿಂತೆ. ಮಗ ಓಡುವುದನ್ನು ಕಲಿತ ಖುಷಿ ಅಪ್ಪನ ಮೊಗದಲ್ಲಿ ಕಾಣುತ್ತಿದೆ. ಸ್ವರ್ಗವೇ ಆ ಆಟಿಕೆಯಲ್ಲಿ ಸಿಕ್ಕಂತೆ ಮಗು ಅದನ್ನು ಯಾರಿಗೂ ಕೊಡಲೂ ಒಪ್ಪದೇ ಆ ದೊಡ್ಡ ಪಾರ್ಕಿನಲ್ಲಿ ತನ್ನ ಸಣ್ಣ ಸಣ್ಣ ಮೊದಲ ಹೆಜ್ಜೆ ಇಡುತ್ತಿದೆ.
ಮರದ ಮರೆಯಲ್ಲಿ ಬರಿ ಕನಸಿನಲ್ಲೇ ಕಾಣುತ್ತಿದ್ದ ಪ್ರೇಮ ಸಲ್ಲಾಪಗಳು ಅಲ್ಲಿ ನನಸಾಗುತ್ತಿವೆ.
ಯಾರಾದರೂ ನೋಡಿದರೆ ಏನು ಗತಿ ಎಂಬ ಭಯಕ್ಕಿಂತ ನೋಡಿದರೆ ನೋಡಲಿಬಿಡು
ಎನ್ನುವ ಸಣ್ಣ ನಾಚಿಕೆಯ ಜೊತೆಜೊತೆಗೆ ಒಂದು ಹುಂಬುತನವಿದೆ.

ಜೋತುಬಿದ್ದ ಹೊಟ್ಟೆಯನ್ನು ಮತ್ತೆ ಬೆನ್ನಿಗೆ ಅಂಟಿಸಲು ಒಂದಿಷ್ಟು ಯುವಕ ಯುವಕಿಯರು ಏದುಸಿರಿನಲ್ಲಿ ಓಡುತ್ತಿದ್ದಾರೆ. ಅಷ್ಟೊತ್ತು ಓದಿ ಹರಿಸಿದ್ದು ಬೆವರೋ ಅಥವಾ ಮಂಜಿನ ಹನಿಯೊ ಎಂಬ ಸಣ್ಣ ಅನುಮಾನದೊಂದಿಗೆ ಮತ್ತೆ ಓಡುತ್ತಿದ್ದಾರೆ. ಬಲಗೈಗೆ ಕಟ್ಟಿದ ಸ್ಮಾರ್ಟ್ ವಾಚ್ ಅವರು ಓಡಿದ ಹೆಜ್ಜೆಗಳನ್ನು ಬೆವರಿಲ್ಲದೇ ಎಣಿಸುತ್ತಿದೆ.

ಮೊಮ್ಮಕ್ಕಳ ಒತ್ತಾಯಕ್ಕೆ ಮಣಿದು ಬಂದಿದ್ದ ಅಜ್ಜಿ ಬೆಟ್ಟ ಹತ್ತಲಾಗದೇ ಮೊಮ್ಮಗನ
ಕೈಯಿಡಿದು ಕೂತಿದ್ದಾಳೆ. “ಕಾಮನ್ ಅಜ್ಜಿ..! ಕಾಮನ್ ..!”ಎಂದು ಏಳು ವರ್ಷದ ಮೊಮ್ಮಗಳು ಒಂದೇ ಸಮನೇ ಕೂಗುತ್ತಿದ್ದಾಳೆ. ಮಗಳನ್ನು ಸುಮ್ಮನಿರಲು ಸನ್ನೆ ಮಾಡುತ್ತಲೇ ಊದಿಕೊಂಡಿದ್ದ ಅಮ್ಮನ ಕಾಲನ್ನು ಮಗ ಒತ್ತುತ್ತಿದ್ದಾನೆ..

ಒಂದು ಸುಂದರ ಮುಂಜಾನೆಯ ಸಲ್ಲಾಪವನ್ನು ಕಣ್ಣಿಗೆ ಕಟ್ಟಿಕೊಂಡು, ಆಗ ತಾನೇ ಗ್ರೀನ್ ಸಿಗ್ನಲ್ ಬಿಟ್ಟಾಗ ಎಲ್ಲ ಗಾಡಿಗಳಿಂದ ಸೇರಿ ಉದಯಿಸುವ ಕಪ್ಪು ಮೋಡವನ್ನು ತೂರಿಕೊಂಡು
ನಮ್ಮ ಗಾಡಿ ಮುಂದುವರೆಯುತ್ತಿದೆ !

 

 

 

 

 

ಪುಟ್ಟ ಕಥೆಗಳು -5

ಕಿವಿಯಲ್ಲಿ ಯಾವಾಗಲೂ earphone ಹಾಕಿಕೊಂಡು
ಗಾಡಿ ಓಡಿಸುತ್ತಿದ್ದವನಿಗೆ
ಅದೇ ದಾರಿಯಲ್ಲಿ ಅಪಘಾತಕ್ಕೀಡಾದ ಅವನ ಮಗಳ ಕೂಗು
ಅವನಿಗೆ ಕೇಳಲೇ ಇಲ್ಲ.!

ದುಡ್ಡಿಗಾಗಿ ಅಪ್ಪ ದುಬೈನಲ್ಲಿ ಕಾರ್ಮಿಕನಾಗಿ ಕೆಲಸಮಾಡುತ್ತಿದ್ದ
ಬ್ರೆಡ್ಡಿಗಾಗಿ ಮಗಳು ಪುಟ್ಟ ಅಂಗಡಿ ಮುಂದೆ ಮಾರ್ಮಿಕವಾಗಿ ನಿಂತಿದ್ದಳು.

ಕಂಠ ಪೂರ್ತಿ ಕುಡಿದು waiterಗೆ
೨೦೦ ರೂ ಟಿಪ್ಸ್ ಕೊಡುವ ಕುಡುಕನ ಹೆಂಡತಿಗೆ
ಎರಡು ವರುಷದಿಂದ ತಾನು ಕೇಳುತಿದ್ದ
೨೦೦ರೂ ಸೀರೆಯೂ ದಕ್ಕಿಲ್ಲ !!

ಸಾಲುತ್ತಿಲ್ಲವೇ ಸಾಲುತ್ತಿಲ್ಲವೇ..!

ಸಾಲುತ್ತಿಲ್ಲವೇ ಸಾಲುತ್ತಿಲ್ಲವೇ
ಸಾಲುತ್ತಿಲ್ಲವೇ ಸಾಲುತ್ತಿಲ್ಲವೇ
ಬಾರೋ ಸ್ಯಾಲ್ರಿ ಕೈಗೆ ಉಳಿಯೋದಿಲ್ಲವೇ

ಒಂದೇ ಸಮನೇ Loanu ಕಟ್ಟಿಬಂದಮೇಲೂ
ಎಲ್ಲಾ TAXu ಈಗ ಕಟ್ ಆದಮೇಲೂ
ಪಬ್ಬಿನಲ್ಲಿ ಕುಳಿತುಕೊಂಡು
ಚಿಲ್ಲ್ಡ್ ಬಿಯರ್ ಕುಡಿದುಕೊಂಡು
ಫ್ರೆಂಚ್ ಫ್ರೈಸ್ ತಿಂದ ಮೇಲೂ …..
ಸಾಲುತ್ತಿಲ್ಲವೇ ಸಾಲುತ್ತಿಲ್ಲವೇ
ಬಾರೋ ಸ್ಯಾಲ್ರಿ ಕೈಗೆ ಉಳಿಯೋದಿಲ್ಲವೇ

ನನ್ನ ಅಪ್ಪಾಜಿಯ ಎರಡನೇ ಮಗ…!

ನನ್ನ ಅಪ್ಪಾಜಿಯ ಎರಡನೇ ಮಗ.

ಸಂಜೆ ೬ ಘಂಟೆ ಸಮಯ. ಅಪ್ಪ ಆಗ ಇನ್ನೂ ಹೊಲದಲ್ಲಿದ್ದರು. ಆಗ ಮುಂಗಾರಿನ ಮೋಡಗಳ ಗುಡುಗು, ಮಿಂಚುಗಳ ಆರ್ಭಟ. ಅಪ್ಪನ ಬರುವಿಕೆಗೆ ಅಮ್ಮ ನಾನು ಕಾಯುತ್ತಿದ್ದೆವು. ಅಂದು ಅಪ್ಪನ ಜೊತೆಯಲ್ಲಿ ಯಾರು ಹೊಲಕ್ಕೆ ಹೋಗಿರಲಿಲ್ಲ. ಸಹಜವಾಗಿಯೇ ನಮಗೆ ಆತಂಕವಿತ್ತು.

ಅಪ್ಪ ಕಾರ್ಮೋಡಗಳ ನೋಡಿ ಮಳೆ ಬರುವುದೆಂದು ಊಹಿಸಿ ಆದಾಗಲೇ ನಮ್ಮ ಹೊಲದದಿಂದ ಒಂದು ಕಿ.ಮೀ ದೂರದ ಹೆದ್ದಾರಿಗೆ ಸೇರಿದ್ದರು.  ಇಲ್ಲವಾದರೆ ಎರೆಭೂಮಿ ಎಂದು ಕರಿಯಲ್ಪಡುವ ನಮ್ಮ ಹೊಲದ ಮಣ್ಣು ಮೋಟಾರ್ ಬೈಕ್ ನ ಗಾಲಿಗೆ  ಅಂಟಿ ಹೆದ್ದಾರಿ ತಲುಪಲು ತುಂಬಾ ಕಷ್ಟ ಪಡಬೇಕಾಗುತ್ತದೆ.

ಆದಾಗಲೇ ಮಳೆ ಬರುತ್ತಿತ್ತು. ಇನ್ನೂ ಕಾದರೆ ಮುಂದೆ ಹಳ್ಳ ಬರಬಹುದು ಎಂದು ಅಪ್ಪ ಮಳೆಯಲ್ಲಿಯೇ ಬೈಕ್ನಲ್ಲಿ ಬರುತ್ತಿದ್ದರು. ತುಂಬಾ ಮಳೆಯ ಕಾರಣ ತೆಗ್ಗುಗಳಲ್ಲಿ ನೀರು ಅದಾಗಲೇ ತುಂಬಿತ್ತು. ಇಳಿಜಾರಿನ ಪ್ರದೇಶದಲ್ಲಿ ನೀರಿನ ಹರಿವು ಇತ್ತು.ನಮ್ಮೋರಿಗೆ ಹಾಗೂ ನಮ್ಮ ಹೊಲಕ್ಕೆ. ಸುಮಾರು ೭ ಕಿ.ಮೀ ದೊರವಿದೆ ಅಪ್ಪ ದಾರಿಯಲಿ ಬರಬೇಕಾದರೆ ಇಳಿಜಾರಿನಲ್ಲಿದ್ದ ನೀರು ಬೈಕಿನ ಸೈಲೆನ್ಸರ್ ಪೈಪ್ ನಲ್ಲಿ ಹೊಕ್ಕು ಬೈಕ್ ನಿಧಾನವಾಗಿ ತನ್ನ ಚಲನೆ ಕಳೆದುಕೊಂಡು ನಿಂತುಬಿಡುತ್ತೆ. ಊರು ಸೇರಲು ಇನ್ನೂ ಮೂರು ಕಿ.ಮೀ ದೂರ ಬರಬೇಕಿತ್ತು . ಆದಾಗಲೇ ಮಳೆ ಜೋರಾಗಿ ಬರುತಿತ್ತು. ಅಪ್ಪ ಎಷ್ಟೇ ಜೋರಾಗಿ ಕಿಕ್ ಸ್ಟಾರ್ಟ್ ಮಾಡಿದರು ಗಾಡಿ ಶುರುವಾಗಲೇ ಇಲ್ಲ.

ಕೊನೆಗೆ ಅಪ್ಪ ಸಾಕಾಗಿ ಒಂದಿಷ್ಟು ಕಾಲ ಅಲ್ಲಿಯೇ ಮರದ ಕೆಳಗೆ ಕುಳಿತು ಒಂದು ಸಿಗರೇಟು ಸೇದುತ್ತಾರೆ. ನಂತರ ಗಾಡಿ ಮೇಲೆ ಕುಳಿತು “ನಡಿ ಮಗ ಟೈಂಯಾಯ್ತು ” ಎಂದು ಪೆಟ್ರೋಲ್ ಟ್ಯಾಂಕಿನ ಮೇಲೆ ಬೆನ್ನು ತಟ್ಟಿದ ಹಾಗಿ ತಟ್ಟಿ, ಒಂದೇ ಒಂದು ಕಿಕ್ ಒದ್ದರೇ ಬೈಕು “ಡ್ರಿನ್ ಡ್ರಿನ್…..” ಅಂತ ಶುರುವಾಗಿಬಿಟ್ಟಿತ್ತು ! ರಜನಿಕಾಂತ ಮಾದರಿ ಸಿಗರೇಟ್ ಸೇದುತ್ತಲೇ ತಮ್ಮ ಗಾಡಿಯ ಮೇಲಿನ ಅಭಿಮಾನದಿಂದ ಅಪ್ಪ ಮನೆಗೆ ಬಂದಿದ್ದರು.

ಅಪ್ಪ ತಮ್ಮ ಬೈಕನ್ನು ಮಗನಂತೆ ನೋಡುತ್ತಿದ್ದರು. ಒಮ್ಮೆಮ್ಮೆ ನನಗೆ ಹೇಳೋರು ” ನಿನಗೆ ಕಡಿಮೆ ಮಾಡ್ತೀನಿ ಹೊರೆತು ಗಾಡಿಗೆ ಏನು ಕಡಿಮೆ ಮಾಡಲ್ಲ ” ಅಂತ. ಅಪ್ಪನ ಬೈಕು ಖರೀದಿ ಮಾಡಿ ೧೨ ವರ್ಷಗಳು ಕಳೆದಿವೆ ಆದರೆ ಇಂದಿಗೂ ಪೆಟ್ರೋಲ್ ಇಲ್ಲದೇ ಗಾಡಿ ನಿಂತಿದ್ದು ಉದಾಹರಣೆ ಇಲ್ಲ.  ಅಪ್ಪನ ಬೈಕಿನ ಶಬ್ದ ನಮ್ಮೋರಿಗೆ ಫೇಮಸ್. ನಮ್ಮ ಓಣಿಯಲ್ಲಿ ಅಪ್ಪ ಬೈಕಿನ ಮೇಲೆ ಹೋಗುತ್ತಿದ್ದಾರೆ ಓಣಿಯ ಮನೆಯೊಳಗೇ “ಶಿವಣ್ಣನ ಗಾಡಿ ಇರ್ಬೇಕು ” ಅಂತಲೇ ಮಾತು ಕೇಳುತ್ತಿತ್ತು.ಅಪ್ಪ ತಮ್ಮ ಬೈಕನ್ನು ಯಾರಿಗೂ ಕೊಡುತ್ತಿರಲಿಲ್ಲ. ಇನ್ನೊಂದು ವಿಚಾರವೆಂದರೆ ಅಪ್ಪ ಅದರ ಚಾವಿಯನ್ನು ಅದರಲ್ಲೇ ಬಿಡುತ್ತಿದ್ದರು. ಆದರೂ ಯಾರೂ ಗಾಡಿ ಮುಟ್ಟುತ್ತಿರಲಿಲ್ಲ

ಈಗ ಅಪ್ಪ ಇಲ್ಲ. ಆದರೆ ಆ ಬೈಕು ನಾನು ಓಡಿಸುವಾಗಲೆಲ್ಲ ಅಪ್ಪನ ಜೊತೆ ಬೈಕಿನ ಮೇಲೆ ಊರು ಸುತ್ತಿದ್ದು, ಅಮ್ಮನ ತವರು ಮನೆಗೆ ಬೈಕಿನಲ್ಲೇ ಹೋಗಿದ್ದು, ಹೊಲ ತೋರಿಸಲು ನನ್ನ ಬೈಕಿನ ಮೇಲೆ ಕರೆದುಕೊಂಡು ಹೋಗಿದ್ದು ಎಲ್ಲ ನೆನಪಾಗುತ್ತೆ.ಆ ಬೈಕನ್ನು ಯಾರಿಗೂ ಕೊಡಲು ನಂಗೆ ಇಷ್ಟವಿಲ್ಲ. ಎಷ್ಟೇ ಆದರೂ ಅದು ಅಪ್ಪನ ಎರಡನೇ ಮಗತರ  ಅಲ್ವ ! ?!

ಏಕೆ ಬೇಜಾರು ನಿನಗೆಂದೇ …

ಭಾವಶರಧಿ

ಏಕೆ ಬೇಜಾರು ನಿನಗೆಂದೇ
ಬರೆಯುವೆ ಮೊತ್ತೊಂದು ಸಾಲು..
ಸಾವಿರ ನನ್ನ ಕವಿತೆಗಿಂತ
ನಿನ್ನ ಮುದ್ದು ಮೌನವೇ ಎಲ್ಲಕಿಂತ ಮಿಗಿಲು.. ನನ್ನೆದೆಯ ಮುಗಿಲು..
ಕನಸಿನ ಮನೆಗೆ ಬಾಗಿಲು..
ಇರಲಿ ಆ ತುಂಟು ಕೋಪ ಎಂದಿಗೂ ನನ್ನೊಂದಿಗೆ ಹೀಗೆ
ಪ್ರತಿಕ್ಷಣವೂ ನನ್ನದೆಯಲಿ ಮೂಡುತಿರುವ ನಿನ್ನ ದಿವ್ಯ ಮೊಗದ ಹಾಗೆ
ಬೇರೇನು ಬೇಕು ನನಗೆ ಸ್ನೇಹ ನದಿಯ ಬಿಟ್ಟು
ನಿನಾದರೆ ಕಡಲು, ತೀರವೇ ನನ್ನ ಹೃದಯ
ಅಪ್ಪಿಕೋ ನನ್ನನು, ಅಲೆಯು ತೀರವನ್ನು ಅಪ್ಪಳಿಸುವಂತೆ

View original post

ಎಲ್ಲಿದೆ ಇಲ್ಲಿ ಪುಣ್ಯ ಹುಡುಕಿ ಕೊಡಿ ?

ಕಣ್ಣು ಮುಚ್ಚಿ ಬಿಡುವುದರೊಳಗೆ ಬದುಕು ಬದಲಾಗಿದೆ. ನೆರಳೊಂದೇ ನನ್ನೊಂದಿಗೆ.
ಅದೂ ಕೂಡ ಸಂಜೆಗೆ ಮಾಯ. ಕತ್ತಲಾದರೆ ಮತ್ತೆ ನೋವಾಗುವ ಮಾಯದ ಮನಸಿನ ಗಾಯ.
ಬದುಕು ಸಾವು ಗಿಂತ ಭೀಕರ. ಅಳುವ ಧ್ವನಿಗೆ ಕೇಳುವ ಕಿವಿ ಇಲ್ಲ. ಆದರೂ ಕಣ್ಣೀರು ನಿಲ್ಲಲ್ಲ.
ಬಾಯಿ ಬಿಟ್ಟರೆ ಬೀಗ ಹಾಕುವರೇ ಹೆಚ್ಚು. ಮೌನವೇ ಇಲ್ಲಿ ಮಾತು. ಮೌನದಲ್ಲೇ ನಡೆಯುತ್ತಿದೆ ಎಲ್ಲಾ ಗದ್ದಲ.
ಎಲ್ಲವೂ ಇದ್ದು ಏನು ಇಲ್ಲದ ಹಾಗೆ ಬದುಕುವುದು ಇಲ್ಲಿ ಹೊಸದೇನಲ್ಲ. ಹೊಸದು ಏನೇ ಬಂದರೂ ಅದು ಇಲ್ಲಿ ಹಳೇದು. ಹೊಸತನಕ್ಕೆ ಆಯಸ್ಸು ಕಡಿಮೆ. ನಮ್ಮ ಕಾಲಿನ ಹೇಸಿಗೆ ತೊಳೆದುಕೊಳ್ಳುವುದಕ್ಕಿಂತ ಮತ್ತೊಬ್ಬರ ಕಾಲಿನ ಬ್ರಾಂಡೆಡ್ ಚಪ್ಪಲಿ ಕದಿ ಯುವದರಲ್ಲಿ ಜನ ಮಗ್ನ. ನಗ್ನ ಸಮಾಜದಲ್ಲಿ ಎಲ್ಲವೂ ಇಲ್ಲಿ ಭಗ್ನ !
ಯಾವ ಉಸಿರಿಗೆ ಇಲ್ಲಿ ಎಷ್ಟು ಬೆಲೆ ..ಯಾರಿಗೆ ಗೊತ್ತು ?
ನಾವು ಉಸಿರಾಡುವ ಗಾಳಿಗೂ ನಮ್ಮ ಪಾಪ ತಗುಲಿದೆ.
ಎಲ್ಲಿದೆ ಇಲ್ಲಿ ಪುಣ್ಯ ಹುಡುಕಿ ಕೊಡಿ ?

ತಿರುವು.

ಗಾಣದ ಎತ್ತಿನಂತೆ ತಿರುಗುತ್ತಿರುವೆ
ಈ ಬದುಕಿನ ಸುತ್ತ.
ಕಣ್ಣುಬಿಟ್ಟರೂ ತೆರೆದರೂ
ಬೆಳಕು ಶೂನ್ಯ ಮೊತ್ತ.
ಅದ್ಯಾವ ದೇವಗಾಣಿಗ ನನ್ನ
ದುಡಿಸಿಕೊಳ್ಳುತ್ತಿದ್ದಾನೋ ಅವನೇ ಬಲ್ಲ
ಕೊಟ್ಟಿದ್ದು ಮಾತ್ರ ಜಾಸ್ತಿ ಬೇವು ಕಮ್ಮಿ ಬೆಲ್ಲ..

ಮತ್ತೆ ಬರೆವಣಿಗೆಯ ಮೆರವಣಿಗೆ…

ಇನ್ಮುಂದೆ ಮತ್ತೆ ಬರೀತೀನಿ.

ಪ್ರೀತಿ ಇರಲಿ.

ನಿಮ್ಮ ವಿನಯ್

ಕಹಳೆ ಅರ್ಪಿಸುವ ರಾಜ್ಯ ಮಟ್ಟದ ಕಥೆ ಸ್ಪರ್ಧೆ

**ಎಲ್ಲರಿಗೂ ಯುಗಾದಿ ಹಬ್ಬದ ಶುಭಾಶಯಗಳು**
ಕಣ್ಣಾರೆ ಕಂಡಿದ್ದೋ , ಕಲ್ಪನೆಯಲ್ಲಿ ಕನವರಿಸಿದ್ದೋ , ವಿಧಿಯನ್ನು ಕಾಲದ ಕಟಕಟೆಯಲ್ಲಿ ನಿಲ್ಲಿಸಿ ಸರಿ ತಪ್ಪುಗಳ ವಿಮರ್ಶಿಸಿದ್ದೋ ಎಲ್ಲವನ್ನೂ ಅಕ್ಷರಕ್ಕಿಳಿಸಿ..! “ಕಹಳೆ” ಯ ಕಥಾಸ್ಪರ್ಧೆ” ಯಲ್ಲಿ ಭಾಗವಹಿಸಿರಿ!
ಸ್ಪರ್ಧೆಯ ನಿಯಮಗಳು :
೧. ಹರಿಯುವ ಅಕ್ಷರದ ಹೊಳೆಗೆ ತಡೆಯೇಕೆ ?ಕಥೆಗೆ ಪದಗಳ ಮಿತಿಯಿಲ್ಲ.
೨. ಒಬ್ಬರು ಎಷ್ಟು ಕಥೆಗಳನ್ನು ಬೇಕಾದರೂ ಕಳುಹಿಸಬಹುದು.
೩. ನಿಮ್ಮ ಕಥೆಗಳನ್ನು “ಕಹಳೆ” ಫೇಸ್ಬುಕ್ ಪುಟದಲ್ಲಿ ,ನಮ್ಮ ಕರ್ನಾಟಕ ಮಿಮ್ಸ್ ಹಾಗೂ ಇರುವೆ ಫೇಸ್ಬುಕ್ ಪುಟದಲ್ಲಿ ಪ್ರಕಟಿಸಲಾಗುವುದು.
೪. ನಾಡಿನ ಪ್ರಖ್ಯಾತ ಬರಹಗಾರರಿಂದ ವಿಜೇತರನ್ನು ಆಯ್ಕೆ ಮಾಡಲಾಗುವುದು.
೫. ವಿಜೇತರಿಗೆ ಸಾವನ್ನ ಪಬ್ಲಿಕೇಶನ್ ರವರಿಂದ ಪುಸ್ತಕಗಳು, ಇರುವೆ ತಂಡದಿಂದ ಗಿಫ್ಟ್ ಕೂಪನ್ಸ್ ಹಾಗೂ ನಮ್ಮ ಕರ್ನಾಟಕ ಮಿಮ್ಸ್ ಅವರಿಂದ ಕೂಡ ಬಹುಮಾನಗಳು ಕಾದಿವೆ!.
೬. ಸ್ಪರ್ಧೆಯ ಕುರಿತ ಎಲ್ಲಾ ವಿಷಯಗಳಲ್ಲಿ ಕಹಳೆಯ ನಿರ್ಣಯವೇ ಅಂತಿಮ ನಿರ್ಣಯ.
ನಿಮ್ಮ ಕಥೆಗಳನ್ನು ನುಡಿ ಇಲ್ಲವೇ ಯೂನಿಕೋಡ್’ನಲ್ಲಿ ಟೈಪ್ ಮಾಡಿ hello@kahaLe.org ಗೆ ಇಮೇಲ್ ಮಾಡಿ.
***ನಿಮ್ಮ ಕಥೆಗಳು ನಮಗೆ ತಲುಪಲು ಏಪ್ರಿಲ್ 10th , 2017 ಕೊನೆಯ ದಿನಾಂಕವಾಗಿರುತ್ತದೆ.***
ಸ್ಪರ್ಧೆಗೆ ಸಂಬಂಧಿಸಿದ ಹೆಚ್ಚಿನ ಮಾಹಿತಿಗಾಗಿ ಫಾಲೋ ಮಾಡಿ
https://www.facebook.com/Kahale.org/
https://www.instagram.com/kahale_org/
www.kahale.org