ಕವನಗಳು

ನನ್ನ ಮನದ ಭಾವನೆಗಳ ನದಿಗೆ ಕಟ್ಟಿದ ಆಣೆಕಟ್ಟು

ನನ್ನ ಎರಡನೇ ಸ್ಟಾರ್ಟ್ ಅಪ್ | ArtSoul.in

ಎರಡು ವರ್ಷದಿಂದ ಸೃಜನಶೀಲ ಕನ್ನಡ ಸಾಹಿತ್ಯ ಚಟುವಟಿಕೆಗಳ ವೇದಿಕೆ -ಕಹಳೆ ಎಂಬ ಸಂಸ್ಥೆ ಶುರುಮಾಡಿದ್ದು ನಿಮಗೆಲ್ಲರಿಗೂ ತಿಳಿದಿದೆ.
ನಮ್ಮ ಕಹಳೆ ಕಾರ್ಯಕ್ರಮಗಳ ಹೆಚ್ಚಿನ ಮಾಹಿತಿಗೆ ಭೇಟಿ ನೀಡಿ : http://www.kahale.org

ಈಗ ಮೊತ್ತೊಂದು ಸಂಸ್ಥೆ ಶುರುಮಾಡಿದ್ದೇನೆ ಎಂದು ತಿಳಿಸುವುದಕ್ಕೆ ಸಂತಸವಾಗುತ್ತಿದೆ.
ಹೊಸ ಸಂಸ್ಥೆ ಹೆಸರು ಆರ್ಟ್ ಸೋಲ್
ಅತ್ಯುತ್ತಮ ಕಲೆಗಳನ್ನು ಟೀಶರ್ಟ್, ನೋಟಬುಕ್ಸ್, ಪೋಸ್ಟರ್ಸ್ ಹೀಗೆ ಹಲವಾರು ಪ್ರಾಡಕ್ಟ್ ಗಳ ಮೇಲೆ ಬಳಸುವ ಪ್ರಯತ್ನ.
ಹೆಚ್ಚಿನ ಮಾಹಿತಿಗೆ : http://www.artsoul.in

Few Sample designs :

ನೋಡಿ ಸ್ವಾಮಿ ನಮ್ಮೂರ ಜಾತ್ರೆ ಹೀಗಿದೆ !

ಊರಿನ ಸಂತೆಯಲ್ಲಿ
ಸಾಬರ ಬಳೆ ಅಂಗಡಿ ಮುಂದೆ ನಿಂತ ಹುಡುಗಿ
ತನ್ನ ಮುಂಗುರುಳ ಸರಿಸುತ್ತ ಮುಗುಳ್ನಗುತ್ತಿದ್ದಾಳೆ.
ಅವಳ ಕೈಸೇರಿ ನಾಚುತ್ತಿರುವ ಬಳೆಗಳೇ ಅದಕ್ಕೆ ಸಾಕ್ಷಿ !
ಕಣ್ಣ ಮಿಟುಕಿಸುವುದರೊಳಗೆ ಚಿಟ್ಟೆಯಂತೆ ಹಾರಿ
ವರ್ಷಕ್ಕೊಮ್ಮೆ ತಯಾರಾಗುವ ಮಾನವ ತೋಟದಲ್ಲಿ ಮರೆಯಾಗಿದ್ದಾಳೆ..
ಇತ್ತ ತೇರಿಗೆ ಎಸೆಯುವ ಉತ್ತತ್ತಿಗಳು
ಬೋಳು ತಲೆಗಳ ಮೇಲೆ , ಆಂಟಿಗಳ ಬೆನ್ನಿಗೆ
ಬಿದ್ದಷ್ಟು ಬೀಳಲಿ ಎಂದು ಚಾಚಿದ ಅಜ್ಜಿಗಳ ಸೆರಗಿಗೆ
ಯುದ್ಧದಲ್ಲಿನ ಗುಂಡುಗಳಂತೆ ಬಂದು ಬೀಳುತ್ತಿವೆ !!
ನಾನಾಕಿದ ಚಪ್ಪಲಿ ನಿಂತಲ್ಲೆ ತೆಗೆದು ತೇರಿಗೆ ಗುರಿಯಿಟ್ಟು
ಉತ್ತತ್ತಿ ಒಗೆದೆ..
ಅವುಗಳನ್ನೇ ದಿಟ್ಟಿಸಿ ನೋಡಲು ,
ಗಾಜಿನ ಬಳೆತೊಟ್ಟ ಹುಡುಗಿ , ತನ್ನೆಡೆಗೆ ಬಂದ ಜೋಡಿಉತ್ತತ್ತಿಗಳನ್ನು
ಕ್ರಿಕೆಟ್ ನಲ್ಲಿ ಹಿಡಿಯುವ ಕ್ಯಾಚಿನಂತೆ ಹಿಡಿದಿದ್ದಾಳೆ ..!
ದಿಟ್ಟಿಸಿ ನೋಡಿದರೆ ಅದೇ ಹುಡುಗಿ, ಅದೇ ಮುಗುಳ್ನಗು , ಅದೇ ಬಳೆಗಳು !!

ಮುಂದಿನ ಜಾತ್ರೆಗೆ ಜೊತೆಯಾಗಿ ಬರಬೇಕೆಂಬ ಸಣ್ಣ ಆಸೆಯೊಂದಿಗೆ
ಅವಳತ್ತ ನಡೆದೆ..
ತೇರು ಪಾದಗಟ್ಟಿ ಮುಟ್ಟಿ ಪುನಃ ತನ್ನ ಸ್ಥಾನಕ್ಕೆ ಬರುವುದರೊಳಗೆ
ಇಬ್ಬರು ಸೇರಿ ೨೦ ಉತ್ತತ್ತಿಗಳನ್ನು ಕೂಡಿಹಾಕಿದ್ದೆವು.. ಒಂದಿಷ್ಟು ನೆನಪುಗಳೊಂದಿಗೆ !

ಜೊತೆಗೆ ತಿಂದಿದ್ದಕ್ಕೇನೋ ,
ಮಂಡಕ್ಕಿ , ಮಿರ್ಚಿ ಬಜ್ಜಿ ಯಾವುದು ಖಾರವೆನಿಸಲಿಲ್ಲ !
ಅವಳು ಕೊಡಿಸಿದ ಜಿಲೇಬಿ ಕೂಡ ಅವಳ ನಗುವಷ್ಟು ಸಿಹಿಯಾಗಿರಲಿಲ್ಲ !
ನಾನು ಊದಿಕೊಟ್ಟ ಹೃದಯಾಕಾರದ ಬಲೂನು ಅವಳ ಕೈಯಲ್ಲಿದೆ
ಅವಳು ಕೊಡಿಸಿದ ಬಣ್ಣದ ಗಾಳಿಪಟ ನನ್ನ ಕೈಯಲ್ಲಿದೆ ..
ಮುಂಗುರಳ ಸರಿಸಿದ ಅವಳ ಬೆರಳೀಗ ನನ್ನ ಬೆರಳಿಡಿದು ಊರ ಮುಖ ನೋಡಿದೆ !
ನೋಡಿ ಸ್ವಾಮಿ ನಮ್ಮೂರ ಜಾತ್ರೆ ಹೀಗಿದೆ !

 

ಮತ್ತೆ ಬೆಳಗಾಗಿದೆ ….

ಮತ್ತೆ ಬೆಳಗಾಗಿದೆ ….
ತನ್ನನ್ನು ಎಷ್ಟೇ ತುಳಿದರೂ
ತಾಳ್ಮೆಯಿಂದ ಮುನ್ನುಗ್ಗುವ
ಪೇಪರ್ ಮಾರುವನ ಸೈಕಲ್ ನ ಪೆಡೆಲ್ಗಳಿಗೆ …

ಮತ್ತೆ ಬೆಳಗಾಗಿದೆ
ನಿನ್ನೆ ಉಳಿದು , ಇಂದು ಚಿತ್ರಾನ್ನಕ್ಕೂ ಬಾರದೆ
ಭಿಕ್ಷಕಿಯ ಜೋಳಿಗೆಯಲ್ಲಿ ಬೆಚ್ಚನೆ ಸೇರುವ ಸಿರಿವಂತರ ಬಡ ಅನ್ನಕ್ಕೆ

ಮತ್ತೆ ಬೆಳಗಾಗಿದೆ
ಟ್ರಾಫಿಸ್ ಸಿಗ್ನಲ್ ಬಿದ್ದರೆ ಸಾಕು ಮ್ಯಾರಥಾನ್ ಅಲ್ಲಿ ಓಡುವಾಗೆ ಓಡುವ ಪುಟ್ಟ ಕಾಲುಗಳಿಗೆ
ಹಾಗೂ ಕೈಯಲ್ಲಿದ್ದ ಬಲೂನಿನಒಳಗಿರುವ ಬಡ ಬಿಸಿ ಉಸಿರಿಗೆ …

ಮತ್ತೆ ಬೆಳಗಾಗಿದೆ
ಊರಾಚೆಯ ಪುಟ್ಟ ಚಹಾದಂಗಡಿಯಲ್ಲಿ
ಒಬ್ಬ ರೈತ ಉದ್ರಿ ಹೇಳುತ್ತಲೇ ಸೇದುವ ಬೀಡಿಗೆ
ಬಾಲ ಅಲ್ಲಾಡಿಸುತ್ತ ಹಿಂದೆ ಬಂದ ನಾಯಿಗೆ
ಅವನಾಕುವ ಬ್ರೆಡ್ಡಿಗೆ

 

ಒಂದು ಗೋಡೆ ಎರಡು ಕಿಟಕಿಗಳು ..

ಒಂದು ಗೋಡೆ ಎರಡು ಕಿಟಕಿಗಳು ..

ಒಡೆದ ಗೋಡೆಗೆ ತಲೆಮಾರುಗಳ ಸ್ಪರ್ಶ ದಕ್ಕಿದೆ
ಯಾರೂ ಕೇಳದ ಈ ಮನೆಯ ಗುಟ್ಟುಗಳನ್ನು
ವಿಧಿಯಿಲ್ಲದೇ ಗೋಡೆ ಕೇಳುತ್ತಲೇ ಬಂದಿದೆ..
ಒಂದೆರಡು ಪಕಳೆಗಳನ್ನು ತಾನೇ ಬೀಳಿಸಿಕೊಂಡು,
ತನ್ನನ್ನು ಕಟ್ಟಿದವರನ್ನು ಕರೆಯಿಸಿ ಎಂದು ಮನೆಮಾಲೀಕನನ್ನು
ದುಂಬಾಲು ಬಿದ್ದಿದೆ…
ಮೊದಲರಾತ್ರಿಯ ಕಾಮದಾಟದ ಸದ್ದನ್ನು,
ಆಗಷ್ಟೇ ಹುಟ್ಟಿದ ಕೂಸಿನ ಅಳುವನ್ನು ,
ಮನೆ ಅಜ್ಜಿ ತೀರಿಕೊಂಡಾಗ ಈಡೀ ಊರಿನ ದುಃಖವನ್ನು
ಸತ್ಯನಾರಾಯಣ ಪೂಜೆಯ ಮಂತ್ರಗಳನ್ನು
ಹೀಗೆ ಮನೆಯ ಮತ್ತು ಮನಸ್ಸಿನ ಎಲ್ಲ ಮಾತುಗಳಿಗೆ
ಈ ಗೋಡೆ ಕಿವಿಯಾಗಿದೆ..
ಬರೀ ಒಂಟಿಯಾಗಿದ್ದ ಈ ಗೋಡೆಗೆ ಎರಡು ಕಿಟಕಿಗಳು ಜಂಟಿಯಾಗಿವೆ
ಮುಂದಿನ ಪೀಳಿಗೆಯ ಖುಶಲೋಪರಿಗಳನ್ನು ಕೇಳಲು ಅವತಣಿಸಿವೆ

 

ನೀ ಮುಗುಳುನಗುವಾಗ

ನೀ ಮುಗುಳುನಗುವಾಗ
ಹಾಲಿನ ಕಡಲಿನಂತಿರುವ
ನಿನ್ನ ಕೆನ್ನೆಯ ಮೇಲೆ
ಅಲೆಗಳು ಮೂಡಿದಂತಿದೆ…
ಬೆಳದಿಂಗಳಿಗಿಂತ ಬೆಳ್ಳಗಿರುವ
ನಿನ್ನ ಕಣ್ಣಿನ ಹೊಳಪಿನ ನಡುವೆ
ನಕ್ಷತ್ರದಂತೆ ನಿನ್ನ ಬಿಂದಿ ಹೊಳೆಯುತ್ತಿದೆ..
ಮಾತು ಮತ್ತು ಮೌನ ಅದ್ಯಾರೋ ಮಿಶ್ರಣ ಮಾಡಿ
ನಿನ್ನ ತುಟಿಗೆ ಲೇಪಿಸದಂತಿದೆ..
ಸುಯ್ಯನೆ ಬೀಸುವ ಗಾಳಿಗೆ
ಮಕ್ಕಳು ಉಯ್ಯಾಲೆ ಜೀಕುವಂತೆ
ನಿನ್ನ ಕಿವಿಯೊಲೆ ತೂಗಿದಂತಿದೆ.

ದಯವಿಟ್ಟು ಗಮನಿಸಿ …!

ದಯವಿಟ್ಟು ಗಮನಿಸಿ
ಹುಲುಮಾನವರು ನಾವು
ಒಂಚೂರು ಸಹಕರಿಸಿ
ದೇವಮಾನವರು ನೀವು!
ಪಾಪ ಪುಣ್ಯಗಳ ನೊಂದಾಯಿಸಿ
ಕೊಡು ಶಿಕ್ಷೆ ತಂದೆ ಚೂರು ಕ್ಷಮಿಸಿ
ಸಾಕಪ್ಪ ನಮ್ಗೆ ಈ ಮಂಡೆಬಿಸಿ
ಕೊಡಬೇಡ ಈ ಜನ್ಮ ಮರುಕಳಿಸಿ..
ದಯವಿಟ್ಟು ಗಮನಿಸಿ
ಹುಲುಮಾನವರು ನಾವು….

ಗಲ್ಲಿಗಲ್ಲಿಗೂ ನಿನ್ನ ದೇವಸ್ಥಾನ
ಕಲ್ಲು ಕಲ್ಲಿಗೂ ನಿನ್ನ ನಾಮಕರಣ
ಎಲ್ಲ ಜನನ ಮರಣಕ್ಕೂ ನೀನೇ ಕಾರಣ
ನಿನ್ನ ಹೆಸರಲ್ಲೇ ನಮ್ಮದಿಲ್ಲಿ ರಾಜಕಾರಣ
ಕೊಡಬೇಡ ತಂದೆ ಬಲುದೊಡ್ಡ ಶಿಕ್ಷೆ
ಎತ್ತಲ್ಲ ನಾವು ನಿನ್ನ ಹೆಸರಲ್ಲಿ ಭಿಕ್ಷೆ !
ದಯವಿಟ್ಟು ದಯಪಾಲಿಸಿ
ನಿಮ್ಮ ಭಕ್ತರು ನಾವು
ಒಂಚೂರು ಸಹಕರಿಸಿ
ದೇವಮಾನವರು ನೀವು!

ಎಲ್ಲ ಸುಳ್ಳಿಗೂ ನಿನ್ನ ಮೇಲಾಣೆ
ಸತ್ಯವಾಗಲು ನೀನ್ಯಾರೋ ಕಾಣೆ
ಎಲ್ಲ ಮಂತ್ರಘೋಷಗಳು ನಿನಗೆ ಅರ್ಪಣೆ
ಎಲ್ಲ ಮಾತುಗಳು ನೀ ಬರಕೊಟ್ಟ ಸಂಭಾಷಣೆ!
ದಯವಿಟ್ಟು ಕರುಣಿಸು
ನಿನ್ನ ಅಭಿಮಾನಿಗಳು ನಾವು
ಒಂಚೂರು ಸಹಕರಿಸು
ದೇವಮಾನವರು ನೀವು !!

ಏಕೆ ಬೇಜಾರು ನಿನಗೆಂದೇ …

ಏಕೆ ಬೇಜಾರು ನಿನಗೆಂದೇ
ಬರೆಯುವೆ ಮೊತ್ತೊಂದು ಸಾಲು..
ಸಾವಿರ ನನ್ನ ಕವಿತೆಗಿಂತ
ನಿನ್ನ ಮುದ್ದು ಮೌನವೇ ಎಲ್ಲಕಿಂತ ಮಿಗಿಲು.. ನನ್ನೆದೆಯ ಮುಗಿಲು..
ಕನಸಿನ ಮನೆಗೆ ಬಾಗಿಲು..
ಇರಲಿ ಆ ತುಂಟು ಕೋಪ ಎಂದಿಗೂ ನನ್ನೊಂದಿಗೆ ಹೀಗೆ
ಪ್ರತಿಕ್ಷಣವೂ ನನ್ನದೆಯಲಿ ಮೂಡುತಿರುವ ನಿನ್ನ ದಿವ್ಯ ಮೊಗದ ಹಾಗೆ
ಬೇರೇನು ಬೇಕು ನನಗೆ ಸ್ನೇಹ ನದಿಯ ಬಿಟ್ಟು
ನಿನಾದರೆ ಕಡಲು, ತೀರವೇ ನನ್ನ ಹೃದಯ
ಅಪ್ಪಿಕೋ ನನ್ನನು, ಅಲೆಯು ತೀರವನ್ನು ಅಪ್ಪಳಿಸುವಂತೆ

ಶುದ್ಧಿ:ಶುದ್ಧವಾಗಲಿ ಮನಸು..

ಶುದ್ಧವಾಗಲಿ ಮನಸು
ಬುದ್ಧನ ನಗುವಿನಂತೆ
ಭವ್ಯವಾಗಲಿ ಬದುಕು
ಶುದ್ಧ ಬೆಳದಿಂಗಳಂತೆ!

ಬುದ್ದಿ ಒಸಿ ಮಾಡ್ಕೊಳ್ಳಿ ಬುದ್ಧಿ ಶುದ್ಧಿ
ಹೆಣ್ಣು ಒಂದು ತಾಯಿಯ ರೂಪ
ಏಕೆ ಅವಳಿಗೆ ದೌರ್ಜನ್ಯದ ಶಾಪ
ದೇವರ ಇನ್ನೊಂದು ರೂಪವೇ ಹೆಣ್ಣು
ಇನ್ನಾದರೂ ಬದಲಿಸಿ ನಿಮ್ಮ ಕೆಟ್ಟ ಕಣ್ಣು !
ಬುದ್ದಿ ಒಸಿ ಮಾಡ್ಕೊಳ್ಳಿ ಬುದ್ಧಿ ಶುದ್ಧಿ

ಸಹನೆಗೆ ಹೆಣ್ಣೇ ವಿಶ್ವರೂಪ
ತ್ಯಾಗಕೆ ಅವಳೇ ಪ್ರತಿರೂಪ
ಮನ್ನಾವಾಗದಿರಲಿ ಅವಳಮೇಲಾದ ಪಾಪ
ಹೆಣ್ಣೇ ! ತೋರಿಸುಬಿಡು ಅಗ್ನಿಯಂತ ಕೋಪ
ಅಗ್ನಿಯಂತ ಕೋಪ!

ಶುದ್ಧವಾಗಲಿ ಮನಸು
ಬುದ್ಧನ ನಗುವಿನಂತೆ
ಭವ್ಯವಾಗಲಿ ಬದುಕು
ಶುದ್ಧ ಬೆಳದಿಂಗಳಂತೆ!

20000+ views!

A big thank you to all my readers for this small milestone 🙂

Keep reading! Keep blogging!!

 

ಕನಸಿನ ಬಾಗಿಲು ಬಡಿದು ಏಕೆ ಓಡಿದೆ..

ಕನಸಿನ ಬಾಗಿಲು ಬಡಿದು ಏಕೆ ಓಡಿದೆ
ಈಗಂತೂ ನನ್ನ ಜೀವ ನಿನ್ನೆ ಬೇಡಿದೆ
ಮನಸಿನಲ್ಲಿ ನಿನ್ನ ಮೊಗವು ಹೂವಿನಂತೆ ಅರಳಿದೆ
ಇರುಳಿನಲ್ಲಿ ನಿನ್ನ ನೆನಪು ಬಿಡದೇ ನನ್ನ ಕಾಡಿದೆ
ಬದುಕಲ್ಲಿ ಭರವಸೆಯ ತಂದೊಳೋ ನೀನಲ್ಲವೇ
ಕಣ್ಣೀರ ಹನಿಯಲ್ಲೂ ಕವನ ಬರೆಯಬೇಕೇ
ಬದುಕಲ್ಲಿ ಭರವಸೆಯ ತಂದೊಳೋ ನೀನಲ್ಲವೇ
ಕಣ್ಣೀರ ಹನಿಯಲ್ಲೂ ಕವನ ಬರೆಯಬೇಕೇ…….