hanigavanagalu

ಭಾವದ ಅಲೆಗಳು!

ಮುಂಗುರಳ ಸರಿಸಿ ನೀನು ನೋಡಿದರೆ ನನ್ನನು …

ಮುಂಗುರಳ ಸರಿಸಿ ನೀನು
ನೋಡಿದರೆ ನನ್ನನು
ಇರಬಹುದೇ ನಾನು
ಪ್ರೇಮಿಸದೇ ನಿನ್ನನು
ಮನಸಿನ ಅರಮನೆ
ಉದ್ಘಾಟಿಸು ನೀನು
ಕನಸಿನ ಸಿಂಹಾಸನ
ಆಲಂಕರಿಸು ನೀನು !
ಈ ಒಲವಿಗೆ ನೂತನ
ಆಯಾಮ ನೀನು
ನಿನ್ನ ಗುಲಾಮ ನಾನು..
ನಿನ್ನ ಗುಲಾಮ ನಾನು !!

ಮುಂಗುರಳ ಸರಿಸಿ ನೀನು
ನೋಡಿದರೆ ನನ್ನನು …

ಮೊದಲ ಸಲ ನಿನ್ನ ನೋಡಿದಾಗ
ಎಲ್ಲ ಖುಷಿಯೂ ಒಮ್ಮೆಲೇ
ಸಿಕ್ಕಂತಾಯಿತು ಹೃದಯಕ್ಕೆ
ಬಿಡದೆ ನೀ ಹೀಗೆ ಕಾಡಿದಾಗ
ಪ್ರತಿ ಕನಸಲ್ಲಿಯೂ ಹೂಮಳೆ
ಮತ್ತೇನು ಬೇಕು ಪ್ರಣಯಕ್ಕೆ ?

ಒಲವಿನ ನೂತನ ಆಯಾಮ ನೀನು
ನಿನ್ನ ಗುಲಾಮ ನಾನು
ನಿನ್ನ ಗುಲಾಮ ನಾನು

ಬದುಕಿನ ಮೇಲಿನ ಅಸ್ಪಷ್ಟತೆ …

ಬದುಕಿನ ಮೇಲಿನ ಅಸ್ಪಷ್ಟತೆ
ಮನದ ಕಾರ್ಮುಗಿಲಿನ ಹಾಗೆ ದಟ್ಟವಾಗಿದೆ.
ಎಲ್ಲ ಉತ್ತರವೂ ಪ್ರಶ್ನೆಯಾಗೇ ಕಾಣುತ್ತಿದೆ, ಕಾಡುತ್ತಿದೆ
ಯಾರಿಗೂ ಹೇಳದ ಅಸಹಾಯಕತೆ
ಹೇಳಿಕೊಂಡರೂ ಮುಗಿಯದ ವ್ಯಥೆ
ಅರ್ಥವಿಲ್ಲದ, ಅಸಂಬಂಧ ಯೋಚನೆಗಳ
ಘರ್ಷಣೆ ಮನದೊಳಗೆ..
ಹುಡುಕಿದರೂ ಸಿಗದಾಗೆ
ಹುದುಗಿಹೋಗಿದೆ ಧೈರ್ಯ ನನ್ನೊಳಗೆ..
ಎಲ್ಲ ಸ್ನೇಹಿತರಿದ್ದಾರೆ, ಆದರೆ
ಸ್ನೇಹ ಗಟ್ಟಿಯಾಗಿ ಉಳಿದಿಲ್ಲ
ಎಲ್ಲ ಸಂಬಂಧಿಕರಿದ್ದಾರೆ, ಆದರೆ
ಸಂಬಂಧಗಳ ಬೇರು ಆಳವಾಗಿಲ್ಲ

ಈ ಬೆತ್ತಲೆ , ಕತ್ತಲೆ ಬದುಕಿಗೆ
ಬೆಳಕಿನ ವೇಷದ ಹಂಗು ಯಾಕೆ ?
ಸಾಯೋವರೆಗೆ ಈ ಬದಕನ್ನು
ಸಾಯಿಸುತ್ತಲೇ ಬದುಕಬೇಕೇ ?

ಹಳೇ ಕವನಕ್ಕೆ ಹೊಸ ರೂಪ!

 

 

ಈ ಪ್ರೀತಿ …

ನೀ ನನಗೋಸ್ಕರ

Nanagoskar

ನೀನು

ನೀನು
ಕನಸಿನ ಪುಟದೊಳಗೆ
ನವಿರಾಗಿ ಮೂಡಿದ
ನವಿಲುಗರಿ!

ನೀನು
ನನ್ನ ಅಂತರಂಗದ
ನಿರಂತರ ಅನ್ವೇಷಣೆ !

ನಾನು ಇರುಳಾಗುವೆ…

ನಾನು ಇರುಳಾಗುವೆ
ನೀನು ಬೆಳದಿಂಗಳಾಗುವುದಾದರೆ
ನಾನು ಅಲೆಯಾಗುವೆ
ನೀನು ಕಡಲಾಗುವುದಾದರೆ
ನಾನು ದುಂಬಿಯಾಗುವೆ
ನೀನು ಹೂವಾಗುವುದಾದರೆ
ನಾನು ಮೋಡವಾಗುವೆ
ನೀನು ಮಳೆಯಾಗುವುದಾದರೆ
ನಾನು ನೀನಾಗುವೆ
ನೀನು ನನ್ನ ಅಪ್ಪಿದರೆ
ಈ ಪ್ರೀತಿಯ ಒಪ್ಪಿದರೆ

ಸರಳ ಸಾಲುಗಳು – ೯

೧.
ನೀನಿರದ ಕ್ಷಣ
ನಾನು, ನನ್ನ ಮನ
ಬರೀ ಮೌನ…..

೨ .
ಮತ್ತೆ ನೀನು ಕೈಚಾಚು
ಕೈಹಿಡಿವೆ ಎಂದೂ ಬಿಡದ ಹಾಗೆ..
ಎದೆಯ ಮೇಲೆ ಸುಮ್ಮನೆ ಗೀಚು
ಎಂದಿಗೂ ಅಳಿಸದ ಹಾಗೆ…

೩.
ಮಳೆಬಂದಾಗ
ಎಲೆಯ ಮೇಲೆ ಕುಣಿವ
ಮಳೆ ಹನಿಗಳ ಹಾಗೆ..
ನಿನ್ನ ಕಂಡಾಗ
ಎದೆಯ ಮೇಲೆ ಕುಣಿದಿವೆ
ನಿನ್ನದೇ ಕನಸುಗಳು….

೪.
ಈ ವಿರಹದ ಬಿಸಿಗೆ
ಕರಗಿದ ಮೌನವು
ಕಣ್ಣೀರಾಗಿ ಹೊರಹೊಮ್ಮಿದೆ..
ಎಷ್ಟು ಹೇಳಿದರೂ
ಮುಗಿಯದ ಮಾತುಗಳು
ಎದೆಯೊಳಗೆ ಉಳಿದುಕೊಂಡಿವೆ..

ವಿದಾಯ ಹೇಳುವ ಮುನ್ನ…

ಅವಳಿಗೆ ವಿದಾಯ ಹೇಳುವಾಗಲೂ
ಹೃದಯ ವಿಷಾದಿಸುತ್ತಿದೆ.
ಅವಳು ಕೊಟ್ಟ ವಿರಹದ ನೋವಿಗಿಂತಲೂ
ಅವಳ ಸನಿಹ ಕ್ಷಣ ನೆನಪಾಗುತ್ತಿದೆ.
ಕಣ್ಣೀರು ಹರಿಯುತ್ತಿದೆ.
ಅವಳು ಕೊಟ್ಟು ಹೋದ
ನೋವಿನ ಸಾಲವನ್ನು
ನಾ ಬರೆದ ಸಾಲುಗಳಿಂದಲೇ
ತೀರಿಸುವ ವ್ಯರ್ಥ ಪ್ರಯತ್ನ ನನ್ನದು..
ನಾ ಬರೆದ ಸಾಲುಗಳಲ್ಲಿ
ಮೊದಲ ಪ್ರೀತಿಯ ಸೋಲಿದೆ.
ಪ್ರೀತಿಸಿದ ಹೃದಯದ ಸಾವಿದೆ.
ಅವಳಿಗೆ ಹರಿಸಿದ ಕಣ್ಣೀರ ಹನಿಗಳನು
ನೆನಪಿನ ಲೇಖನಿಯೊಳಗೆ ಸೇರಿಸಿ
ಬಾಳಪುಸ್ತಕದಲ್ಲಿ ಬರೆದ ಸಾಲುಗಳಿವು.
ಅಲ್ಲಲ್ಲಿ ಅಕ್ಷರಗಳು
ಸ್ಪಷ್ಟವಾಗಿ ಕಾಣದಿದ್ದರೆ ಕ್ಷಮಿಸಿ!
ಆ ಅಕ್ಷರದೊಳಗೆ ನನ್ನ
ಕಣ್ಣೀರೂ ಜಾಸ್ತಿಯೇ ಹರಿದಿರಬಹುದು.
ಮುಗಿಯದ ಈ ಬಾಳಪುಸ್ತಕದಲ್ಲಿ
ಕಣ್ಣೀರು ಮುಗಿಯುವರೆಗೆ ಬರೆಯುತ್ತೇನೆ.
ಬರವಣಿಗೆಯಿಂದ ಬರೀ ಅವಳ
ನೆನಪಿನ ಮೆರವಣಿಗೆ ಮಾಡಿದ ನಾನು
ನನ್ನಲ್ಲಿ ಬದಲಾವಣೆ ತಂದು
“ಕವಿ ಕಾಣದನ್ನೂ ಕಂಡು ”
ಕವಿಯಾಗಿ ಬರೆಯುತ್ತೇನೆ !