love poetry

ಬರೀ ಫ್ರೆಂಚ್ ಮಾತಾಡೋ ದೇಶದಲ್ಲಿ ಕೂತು ಬರೆದ ಒಂದಷ್ಟು ಹನಿಗಳು

ಕನಸಿನಲ್ಲಿ ನೀನು ಬಂದಂತೆ..
ಕಣ್ಣಿನಲ್ಲೇ ನನ್ನ ಕರೆದಂತೆ
ಕಿವಿಯಲೇನೋ ಪಿಸಿನುಡಿದಂತೆ
ನಗುವೆಯೇಕೆ ಏನು ತಿಳಿಯದಂತೆ..

ನಿನ್ನ ಕೈ ಹಿಡಿದು
ಒಂದೆರಡು ಕವನ ನುಡಿದು
ಅಪ್ಪುಗೆಯ ಬಯಸುವೆನು
ನೀನು ಒಪ್ಪಿದರೆ..
ನಿನ್ನ ಬೆರಳ ಹಿಡಿದು
ಬರೆಯುವೆನು ಎದೆಯಮೇಲೆ
ನನ್ನೆಲ್ಲ ಭಾವನೆಗಳ ಸುರಿದು
ತಿದ್ದಿ ಬಿಡು ನಾ ತಪ್ಪಿದರೆ..
ಅಪ್ಪಿ ಬಿಡು ನೀ ಒಪ್ಪಿದರೆ..

ಚಳಿಯು ಮೈಗೆ ಕಚಗುಳಿ ಕೊಟ್ಟಂತೆ
ಮಳೆಯೂ ಬಂದು ಮನ ನೆನದಂತೆ
ಕಂಡ ಕನಸು ನನಸಾದಂತೆ
ನಿನ್ನನು ನೋಡಿದರೆ….

ಹೀಗೊಂದು ಸ್ವಪ್ನದ ಸಲ್ಲಾಪ…

ಅವನು ಅವಳ ಕೈಯನ್ನು ಹಿಡಿಯಲು ಒಪ್ಪಿಗೆ ಕೇಳಿದನು..
“ನನ್ನ ಕೈಹಿಡಿಯಲು ಯಾಕಿಷ್ಟು ಆತುರ ?”ಅಂತ ಕೇಳಿದಳು..
“ನಿನ್ನ ಕೈ ರೇಖೆಗಳು, ನನ್ನ ಕೈ ರೇಖೆಗಳು ಬೆಸೆಯಲಿ … ನಮ್ಮ ಬದುಕಿನ ಹಾಗೆ ” ಎಂದ.
ಅವಳ ಕಣ್ಣಲ್ಲಿ ನೀರಾಡಿತ್ತು…

“ಆ ಮೋಡಗಳಿಗೆ ಮುದ್ದಿಸಬೇಕು” ಎನಿಸಿದೆ ಎಂದನು..
“ಹೌದಾ ! ಬಲು ಚಂದ ನಿನ್ನ ಕಲ್ಪನೆ “ಎಂದಳು..
“ನಿನ್ನ ಕೆನ್ನೆಗಳೇ ಆ ಬೆಳ್ಳಿ ಮೋಡಗಳಂತೆ ಇದೆ ” ಎನ್ನುತ್ತಾ ಮುತ್ತಿಟ್ಟನು..
ಅವಳು ನಾಚಿ ನೀರಾದಳು … ಕವಿದ ಮೋಡ ಸುರಿದ ಮಳೆಯಂತೆ…

ನಿನ್ನ ಮೌನವೇ ಮುನ್ನುಡಿ !!

ಹೃದಯ ಬರೆದ ಕವನ ಸಂಕಲನಕೆ
ನಿನ್ನ ಮೌನವೇ ಮುನ್ನುಡಿ
ನಿನ್ನ ನೆನಪುಗಳೇ ಪರಿವಿಡಿ
ನಿನ್ನ ಕನಸುಗಳೇ ಪುಟವಿಡಿ