small stories in kannada

20000+ views!

A big thank you to all my readers for this small milestone 🙂

Keep reading! Keep blogging!!

 

ಪುಟ್ಟ ಕಥೆಗಳು – 1

ಅವನ ಕನಸಿನಲ್ಲಿ ಅವಳು ಬಂದಿದ್ದಳು
ತನ್ನ ಪ್ರೇಮಪತ್ರದೊಂದಿಗೆ..
ಇವನು ಕಾಣಸಿನಲ್ಲಿಯೇ ಮುಗುಳ್ನಕ್ಕ..
ಅವಳು “ಮದುವೆ ಯಾವಾಗ ಆಗೋಣ ?” ಎಂದಳು
ಇವನಿಗೆ ಎಚ್ಚರವಾಯಿತು!

ದೇವಸ್ಥಾನದ ಆರುತಿ ತಟ್ಟೆಯಲ್ಲಿ
ಐನೂರು ನೋಟು ಹಾಕಿದವನು,
ಬಾಗಿಲಲ್ಲಿ ಭಿಕ್ಷೆಬೇಡುತ್ತಿದ್ದ ಅಜ್ಜಿಗೆ
“ಚಿಲ್ಲರೆ ಇಲ್ಲಮ್ಮ ” ಎಂದು ಹೇಳಿ
ತಪ್ಪಿಸಿಕೊಳ್ಳುತ್ತಿದ್ದ.

ಒಬ್ಬ ಭಿಕ್ಷುಕ
ಮೊತ್ತಬ್ಬ ಭಿಕ್ಷುಕನ ಮದುವೆಗೆ ಹೋಗಿದ್ದ
ಅಲ್ಲಿಯೂ ಮಂಟಪದ ಮೇಲೆ
ರಾಶಿ ರಾಶಿ ಅಕ್ಕಿ ಕಂಡು,
ಮರುದಿನವೇ ಮದುವೆಯಾಗಲು ನಿಶ್ಚಯಿಸಿದ!

ನಾನೊಬ್ಬ ಅನಾಥ

ನಾನು ಆರು ತಿಂಗಳು ಕೂಸಿದ್ದಾಗ ನನ್ನ ಹಡೆದವ್ವ ನನ್ನನ್ನು ಬಡತನದ ತೊಟ್ಟಿಲಲ್ಲಿ ನನ್ನ ತೂಗಲು ಇಚ್ಚಿಸದೆ ಮೆಜೆಸ್ಟಿಕ್ ಬಸ್ ನಿಲ್ದಾಣದ ಮೂಲೆಯಲ್ಲಿನ ಒಂದು ಕಸದ ತೂಟ್ಟಿಯಲ್ಲಿ ನನ್ನ ಬಿಟ್ಟು ಅವಳು ತನ್ನ ಜೀವವನ್ನೇ ಬಿಟ್ಟಳಂತೆ!.

ಕಂಕುಳಲ್ಲಿ ಎಂಟು ತಿಂಗಳ ಮಗಳಿದ್ದರೂ ಕಸದ ತೊಟ್ಟಿಲಲ್ಲಿ ಎಡಬಿಡದೆ ಅಳುತ್ತಿದ್ದ ನನ್ನ ಎತ್ತಿಕೊಂಡು ಮುದ್ದಿಸಿ ತನ್ನ ಎದೆ ಹಾಲು ಕೊಟ್ಟು ಸಂತೈಸಿ ತನ್ನ ಮಗನಂತೆ ಮೂರು ವರ್ಷಗಳ ಕಾಲ ನನ್ನ ಸಾಕಿದ ನನ್ನ ಸಾಕವ್ವನ ಹೆಸರು ಲಕ್ಷಮ್ಮ .ಅವಳದ್ದು ಬ್ರಾಹ್ಮಣ ಜಾತಿ. ಎಷ್ಟೇ ಆದರೂ ನಾನು ಬೀದಿ ಮಗುವಲ್ಲವೇ ಲಕ್ಷಮ್ಮನ ಗಂಡನಿಗೆ ನಾನೆಂದರೆ ಇಷ್ಟವಿರಲಿಲ್ಲ . ನನ್ನನ್ನು ಹೊಡೆಯುವುದು ,ಬೈಯುವುದು ಮಾಮೂಲಿ ಆಗಿತ್ತು. ಆದರೂ ಒಂದು ದಿನ ಅವನು ಲಕ್ಷಮ್ಮನ ಜೊತೆ ಜಗಳವಾಡಿ ಅವಳಿಗೆ ಹೊಡೆದು ನನಗೆ ನಿದ್ದೆ ಮಾತ್ರೆ ಕೊಟ್ಟು ಬೆಂಗಳೂರಿನಿಂದ ಚೆನ್ನೈಗೆ ಹೋಗುತ್ತಿದ್ದ ಬಸ್ಸಿನಲ್ಲಿ ನನ್ನ ಕೂರಿಸಿ ಹೊರಟು ಹೋಗಿದ್ದ .

ಕಣ್ಣು ಬಿಟ್ಟರೆ ಇಕ್ಬಾಲ್ ಎನ್ನುವರ ಮನೆಯಲಿದ್ದೆ . ಬಸ್ಸಿನಲ್ಲಿ ಸತ್ತಂತೆ ಮಲಗಿದ್ದ ನನ್ನನ್ನು ಎತ್ತುಕೊಂಡು ಮನೆಗೆ ತಂದಿದ್ದರು.ಇಕ್ಬಾಲ್ ಗೆ ಮಕ್ಕಳಿರಲಿಲ್ಲ ಹೆಂಡತಿ ತೀರಿಹೋಗಿದ್ದರು.ಆಟೋರಿಕ್ಷಾ ಅವರ ಜೀವನೋಪಾಯ.
ಅವರದ್ದು ಮುಸ್ಲಿಂ ಧರ್ಮವಾಗಿದ್ದರೂ ನನ್ನನ್ನು ಎಂದಿಗೂ ಮಸೀದಿಗೆ ಕರೆದುಕೊಂಡು ಹೋದವರಲ್ಲ. ಮನೆಯಲ್ಲಿಯೇ ಎಲ್ಲ ಧರ್ಮದ ದೇವರುಗಳ ಫೋಟೋ ಇಟ್ಟಿದ್ದರು. ಯಾವ ದೇವರ ಮೇಲಾದರೂ ನಂಬಿಕೆ ಇಡು ಆದರೆ ಮಾನವೀಯತೆ ಮಾತ್ರ ಮರಿಬೇಡ ಎಂಬ ಭೋದನೆ ಅವರದ್ದು. ನಿಜವಾದ ಅಪ್ಪನ ಪ್ರೀತಿ ಸಿಕ್ಕಿದ್ದು ಅವರಿಂದಲೇ.
ಆಗ ಆರು ವರ್ಷ ನನಗೆ .ಒಂದು ದಿನ ರಸ್ತೆ ಅಪಘಾತದಲ್ಲಿ ಅವರು ತೀರಿಹೋದರು. ನಾನಾಗ ಮತ್ತೆ ಅನಾಥ

ಇಕ್ಬಾಲ್ ಗೆಳೆಯರು ನನ್ನನ್ನು ‘ಗುರುನಾಥ ಸಿಂಗ್ ಬಾಲಶ್ರಮ’ಕ್ಕೆ ಸೇರಿಸಿದರು. ಸಿಖ್ ಧರ್ಮದ ಆಶ್ರಮವದು.
ಒಂದೇ ವರ್ಷದಲ್ಲಿ ನನಗೆ ಅಲ್ಲಿದ್ದ ಹಲವಾರು ಜನ ಗೆಳೆಯರಾಗಿದ್ದರು. ಅಷ್ಟೊಂದು ಅನಾಥರಿದ್ದಾರೆ ಈ ಸಮಾಜದಲ್ಲಿ ಎಂಬ ಸತ್ಯ ಗೊತ್ತಾಗಿದ್ದೆ ಅಲ್ಲಿ. ಆದರೆ ನಾವ್ಯಾರು ನಮ್ಮ ಅನಾಥರನ್ನಾಗಿಸಿದ ನಮ್ಮ ತಂದೆ ತಾಯಿಗೆ ನಿಂದಿಸಿದವರಲ್ಲ ,ಶಪಿಸಿದವರು ಅಲ್ಲ . ಬದಲಿಗೆ ನಮ್ಮ ಹೆತ್ತವರ ಮುಖದ ಪರಿಚಯವೂ ಇಲ್ಲದ ಬದುಕುತಿರುವ ನಮ್ಮ ಮೇಲೆ ನಮಗೆ ವಿಷಾದವಿತ್ತು. ಎಂದೂ ಅಳಿಸದ ನೋವಿತ್ತು.

ಅದೊಂದು ದಿನ ಆಶ್ರಮಕ್ಕೆ ಕಾರಿನಲ್ಲಿ ಬಂದ ಒಂದು ದಂಪತಿ ನನ್ನನ್ನು ದತ್ತು ತೆಗೆದುಕೊಂಡಿತು. ಅಂದಿಗೆ ಅವರೇ ನನಗೆ ಹೊಸ ಅಪ್ಪ ಅಮ್ಮ . ಅಪ್ಪ ಜೋಸೆಫ್ ಆಗರ್ಭ ಶ್ರೀಮಂತ. ಅಮ್ಮ ಎಲಿಸಬೆತ್. ನನ್ನನ್ನು ಕೊಲ್ಲುವಾಗೆ ನೋಡುತ್ತಿದ್ದ ಅವರ ಮೊದಲ ಮಗ ಆಂತೋನಿ. ಮೂರು ದಿನವಾದ ಮೇಲೆ ಗೊತ್ತಾಗಿದ್ದು ಅವರು ನನ್ನನ್ನು ದತ್ತಕ್ಕೆ ತೆಗೆದುಕೊಂಡವರಲ್ಲ ಅವರ ಮನೆಯ ಜೀತದಾಳಾಗಿ ಎಂದು . ಅವರ ಮನೆಯ ಕಸದಿಂದ ಹಿಡಿದು ಅವರ ಮನೆಯ ಕಕ್ಕಸ ರೂಮನ್ನು ನಾನೇ ತೊಳೆಯಬೇಕಿತ್ತು. ಆದರೆ ಬೇರೆ ವಿಧಿ ಇರಲಿಲ್ಲ.ನೋವು ನುಂಗುತ್ತ ಹೇಗೋ ಒಂದು ವರ್ಷ ಕಳೆದೆ. ಜೀವಕ್ಕೆ ಅಲ್ಲಿರಲಾಗಲಿಲ್ಲ. ಸ್ವಾಭಿಮಾನ ಕೇಳಲಿಲ್ಲ . ಅವರ ಮನೆಯಿಂದ ಓಡಿ ಬಂದೆ.

ಆಗ ನನಗೆ ಎಂಟು ವರ್ಷ. ಮತ್ತೆ ಅನಾಥಾಶ್ರಮ ಸೇರಿದೆ. ನಾನು ಕೇವಲ ಊಟ ನಿದ್ದೆಗೆ ಮಾತ್ರ ಆಶ್ರಮಕ್ಕೆ ಹೋಗುತ್ತಿದ್ದೆ. ಈಡೀ ದಿನ ಕಾರ್ಮಿಕನಾಗಿ ಇಟ್ಟಿಗೆ ಹೊರಲು,ಪಾನಿಪೂರಿ ಅಂಗಡಿಯಲ್ಲಿ ,ಪೇಪರ್ ಮತ್ತು ಹಾಲು ಹಾಕುವ ಕೆಲಸ ಮಾಡುತ್ತಾ ಮಾಡುತ್ತಾ ಹಣ ಕೂಡಿಡುತ್ತಾ ಬಂದೆ. ನಾನು ಎಂದಿಗೂ ಸಾಯುವ ಯೋಚನೆ ಮಾಡಿದವನಲ್ಲ. ನನಗೆ ಅರಿವಿತ್ತು ನನಗೆ ನಾನೊಬ್ಬನೇ ಈ ಜಗದಲ್ಲಿ ಎಂದು. “ನಾ ಸಾಯುವ ಮುನ್ನ ನನ್ನನ್ನು ಹೊರಲು ನಾಲ್ಕು ಜನವನ್ನಾದರೂ ಗಳಿಸಬೇಕೆಂಬ ಛಲವಿತ್ತು. ಅನಾಥನಾಗಿ ಬೆಳೆದ ನಾನು ನನ್ನ ಸಾವು ಅನಾಥವಾಗಬಾರದು ಎಂಬ ಕಳಕಳಿ ಇತ್ತು.” ಕಷ್ಟದಿ ಹರಿಸಿದ ಬೆವರಿಗೆ ಈ ಭೂಮಿ ಮೇಲೆ ಬೆಲೆಯಿದೆ ಎಂಬ ನಂಬಿಕೆ ಇತ್ತು .
ನಾನು ಹಿಂದೂ (ಲಕ್ಷಮ್ಮ ), ಮುಸ್ಲಿಂ (ಇಕ್ಬಾಲ್ ), ಕ್ರೈಸ್ತ (ಜೋಸೆಫ್ ) ,ಸಿಖ್ (ಗುರುನಾಥ್ ಸಿಂಗ್ ಆಶ್ರಮ)
ಧರ್ಮದ ಮನೆಯಲ್ಲಿ ,ಆಶ್ರಮದಲ್ಲಿ ಬೆಳೆದಿದ್ದೇನೆ. ನನಗೆ ಯಾವ ಧರ್ಮದ ಹಂಗೂ ಇಲ್ಲ . ಒಬ್ಬ ಅನಾಥನಿಗೆ ಯಾವ ಧರ್ಮ ಯಾವ ಜಾತಿ ಅಲ್ಲವೇ ?

ಈಗ ನನಗೆ ೩೦ ವರ್ಷ. ” ಹೊಸಬೆಳಕು” ಎಂಬ ಅನಾಥಾಶ್ರಮ ಕಟ್ಟಿಸಿದ್ದೇನೆ. ಶಾರದ ನನ್ನ ಮುದ್ದಿನ ಮಡದಿ. ಆಶ್ರಮದ ಎಲ್ಲ ಮಕ್ಕಳೂ ನನ್ನ ಮಕ್ಕಳೇ .ನನ್ನ ಅನಾಥಾಶ್ರಮದ ಮಕ್ಕಳಿಗೆ ಯಾವ ಜಾತಿಯೂ ಇಲ್ಲ ,ಧರ್ಮವೂ ಇಲ್ಲ. ಎಲ್ಲ ಮಕ್ಕಳಿಗೂ ಒಂದು ಕನಸು ಇದೆ. ಒಂದು ಗುರಿ ಇದೆ. ಬೇಕಿದ್ದರೆ ” ಕನಸು ” ಅವರ ಧರ್ಮವೆನ್ನಬಹುದು.

ಕೊನೆಯಲ್ಲಿ ಒಂದು ಮಾತು
ದೇವರು ನಿಮಗೆ ಅಪ್ಪ ,ಅಮ್ಮ ,ಅಕ್ಕ ,ತಂಗಿ , ಅಣ್ಣ ,ತಮ್ಮ ಬಂಧು ಬಳಗವನ್ನು ಕೊಟ್ಟಿದ್ದಾನೆ. ನೀವು ಧನ್ಯರು.
ನೆನಪಿರಲಿ ಎಲ್ಲರು ಇದ್ದೂ ನೀವು ಅನಾಥರಾಗಬೇಡಿ.

ಇಂತಿ
ಒಬ್ಬ ಅನಾಥ
ಅಲ್ಲ ಅಲ್ಲ
ನಿಮ್ಮೊಳಗೊಬ್ಬ

ಚಿತ್ರ ಕೃಪೆ : Google images

ಒಂದು ಹಣತೆ : ಒಂದು ಸಣ್ಣ ಕಥೆ!

ಒಂದು ದಿನ ಒಂದು ಮನೆಯ ಹಣತೆಯಲ್ಲಿ ಒಂದು ಚಿಕ್ಕ ಭಿನ್ನಾಭಿಪ್ರಾಯ ಶುರುವಾಯಿತು.
ಹಣತೆ ” ನನ್ನಿಂದ ದೀಪ ಉರಿಯುತ್ತಿದೆ ಆ ಬೆಳಕು ನನ್ನದು ” ಎಂದು ಹೇಳಿತು.
ಇದನ್ನು ಕೇಳಿದ ಹಣತೆಯಲ್ಲಿದ್ದ ಎಣ್ಣೆ ” ನಾನು ಆ ದೀಪಕ್ಕೆ ಜೀವಾಳ.ನಾನೇ ಇರದಿದ್ದರೆ ದೀಪವೂ ಇಲ್ಲ, ಬೆಳಕೂ ಇಲ್ಲ ಅದಕ್ಕಾಗಿ ಆ ಬೆಳಕು ನನಗೆ ಸೇರಿದ್ದು” ಎಂದಿತು.
ಇದನ್ನು ಕೇಳಿದ ಬತ್ತಿ ” Hello! ನಾನು ಉರಿಯುತ್ತಿರುವದಿಂದಲೇ ದೀಪ ಉರಿಯುತ್ತಿದೆ logically ಬೆಳಕು ನನ್ನದು “ಎಂದಿತು
ಈ ಕಚ್ಚಾಟವನ್ನು ಸೂಕ್ಷ್ಮದಿಂದಲೇ ನೋಡುತಿದ್ದ ಗಾಳಿ ” ನಾನು ಇಲ್ಲದೇ ದೀಪವು ಉರಿಯಲ್ಲ , ನಾನು ಹೆಚ್ಚಾದರೆ ದೀಪ ಆರಿಹೋಗುತ್ತದೆ ಆದ್ದರಿಂದ ಬೆಳಕು ನನ್ನದು” ಎಂದು ವಾದಿಸಿತು
ನಾನು ನನ್ನಿಂದ ಎಂಬ ಕಚ್ಚಾಟದಲ್ಲಿ ಹಣತೆ ಹೊಡೆದು ಹೋಯಿತು. ಎಣ್ಣೆ ಹರಿದು ಹೋಯಿತು. ಬತ್ತಿಗೆ ಎಣ್ಣೆಯಿಲ್ಲದೆ ಕುಗ್ಗಿ ಹೋಯಿತು. ಗಾಳಿ ಜೋರಾಗಿ ಬೀಸಿ ಉರಿಯುತ್ತಿದ್ದ ದೀಪ ಆರಿಹೋಯಿತು !

ಎಲ್ಲವೂ ಒಟ್ಟಾಗಿ ಇರುತ್ತಿದ್ದರೆ ಆ ದೀಪದ ಭರವಸೆಯ ಬೆಳಕು ಎಲ್ಲರ ಪಾಲಾಗಿತ್ತು.
” ಅಹಂ ಭಾವನೆಯಿಂದ ಅಂಧಕಾರವೇ ಹೊರತು ಬೆಳಕಿನ ಸಾನಿಧ್ಯವಿಲ್ಲ ”
ಆ ಭರವಸೆಯ ಬೆಳಕು ನಿಮ್ಮದಾಗಲಿ

ಕಣ್ಣೀರಿನಿಂದ ಬರೆದ ಪತ್ರ!

ಹೇಳು!
ನೀನು ಹೇಳದೇ ಹೋಗಿದ್ದಾದರೂ ಏಕೆ ? ನಿನ್ನ ನೆನಪುಗಳು ನನ್ನ ಹೃದಯ ಹಿಂಡುತ್ತಿವೆ.ನೀನು ಕೊಟ್ಟು ಹೋದ
ಸುಳ್ಳು ಕನಸುಗಳ ಕಂತೆಯನ್ನು ಬಿಚ್ಚಿಡುತ್ತಾ ಪ್ರತಿ ಕನಸಿಗೂ ಕಣ್ಣೀರಿನ ಅಭಿಷೇಕ ಮಾಡಿಸುತ್ತಿದ್ದೇನೆ.
ನಾನು ಹುಚ್ಚನೂ ಅಲ್ಲ ನನ್ನದು ಹುಚ್ಚು ಪ್ರೀತಿಯೂ ಅಲ್ಲ ಆದರೆ ನೀನು ಬಿಟ್ಟು ಹೋದ ಮೇಲೆ ನನ್ನ ಹೃದಯಕ್ಕೆ ಹುಚ್ಚು ಹಿಡಿದಿದ್ದು ಸತ್ಯ.
ನೂರು ಕಾಲ ನನ್ನೊಂದಿಗೆ ಬಾಳುವ ಕನಸಿನ ಲೋಕವನ್ನೇ ತೋರಿಸಿದ ನೀನು ನನ್ನ ಕಣ್ಣೀರಿನ ಅಭಿಪ್ರಾಯವನ್ನು ಕಿವಿಗೆ ಹಾಕಿಕೊಳ್ಳದೇ ಮೌನವಾಗಿ ಮಾಯವಾಗಿದ್ದು ಎಷ್ಟು ಉಚಿತ ?
ಕನ್ನಡಿಯಲ್ಲಿ ನನ್ನ ಮುಖ ನೋಡಿಕೊಂಡರೆ ನನಗೆ ನಾನೇ ಹೊಸಬನಾಗಿರುವಂತೆ ಅನ್ನಿಸುತ್ತಿದೆ. ಯಾರ ಸುಖಕ್ಕಾಗಿ ಈ ನರಕ ಯಾತನೆ ?
ಸಾಕು ಇನ್ನು ಸಾಕು..
ಬೆಂಕಿಯಂಥ ನಿನ್ನ ನೆನಪುಗಳಿಂದ ನನ್ನ ಹೃದಯ ನರಳುತ್ತಿರುವುದು ಇನ್ನು ಸಾಕು.ಗಡ್ಡ ಬಿಟ್ಟು ದೇವದಾಸ ನಾನಾಗಲಾರೆ. ಕೆಟ್ಟ ಚಟದ ದಾಸನೂ ನಾನಾಗಲಾರೆ.ನನ್ನ ಭವಿಷ್ಯ ರೂಪಿಸುವ ನನ್ನ ಎಲ್ಲ ಕನಸುಗಳ ಹಣತೆಗಳಿಗೆ ‘ನಂಬಿಕೆ’ ಅನ್ನೋ ಎಣ್ಣೆ ಸುರಿದು ‘ಛಲ’ವೆಂಬ ಬತ್ತಿಗೆ ‘ಭರವಸೆ’ಯ ಬೆಳಕು ಹಚ್ಚುತ್ತೇನೆ. ಆ ಬೆಳಕು ನನ್ನ ಹೃದಯದ ಕತ್ತಲನ್ನು ಅಸುನೀಗಿಸಲಿ.

ಮತ್ತೆ ಬಾರದಿರು ನನ್ನ ಹೃದಯ ಆಳಲು , ಹಾಳು ಮಾಡಲು

ಅಜ್ಜಿ ಮತ್ತು ರಮೇಶ

ಬೆಂಗಳೂರು ಎಂಬ ಮಹಾನಗರದಲ್ಲಿ ಒಂದು ಚಿಕ್ಕ ಕುಟುಂಬ. ಅಪ್ಪ,ಅಮ್ಮ ಇಬ್ಬರು ಮಕ್ಕಳು.

ಅಪ್ಪನದು ಸರ್ಕಾರಿ ನೌಕರಿ. ಅಮ್ಮ House Wife.ಮೊದಲನೇ ಮಗ ರಮೇಶ. ನಗರದ ಪ್ರತಿಷ್ಟಿತ ಐಟಿ ಕಂಪನಿಯಲ್ಲಿ ಅವನಿಗೆ ಮೈತುಂಬ ಕೆಲಸ ಕೈತುಂಬ ಸಂಬಳ. ಎರಡನೇ ಮಗ ಕೃಷ್ಣ. ಸರ್ಕಾರಿ ಕೆಲಸದಲ್ಲಿ ಸಂಬಳ ಜೊತೆ ಗಿಂಬಳವನ್ನೂ ಪಡೆಯುತ್ತಿದ್ದ.

ರಮೇಶ ಸಮಾಜಮುಖಿಯಾಗಿದ್ದ. ದುಡ್ಡಿಗಿಂತ ಗುಣ ,ಸಹಾಯ ಮನೋಭಾವ ಮುಖ್ಯ ಎಂಬ ಅರಿವು ಅವನಿಗಿತ್ತು. ದಾರಿಯಲ್ಲಿ ಭಿಕ್ಷೆ ಬೇಡಿದವರಿಗೆ ಎಂದೂ ದುಡ್ಡಿಲ್ಲ ಎಂದವನಲ್ಲ. ಚಿಲ್ಲರೆ ಇಲ್ಲದದಿದ್ದರೂ ಜೇಬಿನಲ್ಲಿ ಎಷ್ಟು ಇರುತ್ತಿತ್ತೋ ಅಷ್ಟನ್ನೂ ಕೊಡುವಷ್ಟು ಕಲಿಯುಗದ ಕರ್ಣ. ಆದರೆ ಅವನ ತಮ್ಮ ಕೃಷ್ಣ ಅದಕ್ಕೆ ಸ್ವಲ್ಪ ವಿರೋಧ ಸ್ವಭಾವದವನು.ನಾವು ಕಷ್ಟ ಪಟ್ಟು ಬೆವರು ಸುರಿಸಿ ದುಡಿದ ಹಣವನ್ನು ಸಲೀಸಾಗಿ ಮೊತ್ತೊಬ್ಬರಿಗೆ ಭಿಕ್ಷೆ ನೆಪದಲ್ಲಿ ಕೊಡುವವನು ಅವನಾಗಿರಲಿಲ್ಲ. ಅವನದು ತುಂಬಾ ಕ್ಯಾಲ್ಕ್ಯುಲೇಟೆಡ್ ಮೈಂಡ್ .ಹಾಗಂತ ಅವನು ಕೆಟ್ಟವನಾಗಿರಲಿಲ್ಲ ಸಹಾಯ ಮನೋಭಾವ ಕಡಿಮೆ ಅಷ್ಟೇ.

ಅವರಿಬ್ಬರ ನಡುವೆ ಆಗಾಗ ದುಡ್ಡಿನ ಬಗ್ಗೆ ,ಚಾರಿಟಿ ಬಗ್ಗೆ ಚರ್ಚೆಗಳಾಗುತ್ತಿದ್ದವು. ಕೆಲವು ಸಲ ಅವು ವಿಕೋಪಕ್ಕೆ ತಿರುಗಿ ಅಣ್ಣ ತಮ್ಮಂದಿರ ಕಾದಾಟಕ್ಕೂ ಕಾರಣವಾಗಿ ಮನೆಲಿದ್ದ ಕೆಲವು ವಸ್ತುಗಳು ಪುಡಿ ಪುಡಿಯಾಗುತ್ತಿದ್ದವುರಮೇಶ ದಿನವೂ ತನ್ನ ಆಫೀಸಿಗೆ ಹೋಗುವಾಗ ದಾರಿಯಲಿ ಸಹಾಯ ಕೇಳಿದರೆ . ಭಿಕ್ಷೆ ಬೇಡಿದರೆ ಅವರಿಗೆ ಸಹಾಯ ಮಾಡಿ ಹೋಗುತ್ತಿದ್ದ. ತಿಂಗಳಿಗೆ ಸಾವಿರಾರು ಗಳಿಸುವ ನಾವು ದಿನಕ್ಕೆ ಒಂದು ರೂಪಾಯಿಯಾದರೂ ಕೊಟ್ಟು ಮೊತ್ತೊಬ್ಬರ ಒಂದು ಹೊತ್ತಿಗೆ ಆಗದಿದ್ದರೂ ಒಂದು ತುತ್ತಿಗೆ ಆಗುವಷ್ಟು ಸಹಾಯ ಮಾಡುವುದರಲ್ಲಿ ತೃಪ್ತಿ ಇದೆ ಎಂದು ಅವನು ನಂಬಿದ್ದ.

ಈಗೆ ಒಂದು ದಿನ ಆಫೀಸಿಗೆ ಹೋಗುವಾಗ ೭೦ರ ಅರೆಯದ ಅಜ್ಜಿಯೊಬ್ಬಳು ಕೈಯಲ್ಲಿ ಕೋಲು ಹಿಡಿದು ಹೆಗಲಿಗೆ ಜೋಗುಳ ಸಿಗಿಸಿಕೊಂಡು ಹಾಡು ಹೋಗುವವರಿಗೆ ದುಡ್ಡಿಗಾಗಿ ಬೇಡುತ್ತಿದ್ದಳು. ರಮೇಶ ಅವಳನ್ನು ಒಂದು ದಿನ ಅವಳಿಗೆ ೧೦ರೂ ಕೊಟ್ಟು ” ಏನ್ ಅಜ್ಜಿ ಈ ವಯಸಲ್ಲಿಯೂ ಭಿಕ್ಷೆ ಬೇಡುತ್ತಿದಿಯಾ ನಿನಗ್ಯಾರು ಮಕ್ಕಲಿಲ್ವ ?” ಎಂದು ಕೇಳಿದ. ಅದಕ್ಕೆ ಆ ಅಜ್ಜಿ ” ಗಂಡ ತೀರಿ ೫ ವರ್ಷವಾಯಿತು. ಇಬ್ಬರೂ ಮಕ್ಕಳು ನನ್ನ ಬಿಟ್ಟುಹೋದರು ” ಎಂದು ಕಣ್ಣೀರಿಟ್ಟಳು. ರಮೇಶನ ಕಣ್ಣಲ್ಲಿಯೂ ನೀರಾಡಿತು. ಅಲ್ಲಿಯೇ ಇದ್ದ ಹೋಟೆಲಿನಿಂದ ೨ ಇಡ್ಲಿ ಪಾರ್ಸೆಲ್ ತಂದುಕೊಟ್ಟು ಅತೃಪ್ತ ಭಾವದಿಂದ ಆಫೀಸಿಗೆ ಹೊರಟ. ಅಜ್ಜಿ ” ದೇವರು ನಿನ್ನ ಚೆನ್ನಾಗಿಟ್ಟಿರಲಿ ಮಗಾ .. ” ಎಂದು ಹೇಳಿ ಪಾರ್ಸೆಲ್ ಬಿಚ್ಚಿ ತಿನ್ನತೊಡಗಿದಳು

ಮರುದಿನ ಮತ್ತದೇ ಅಜ್ಜಿ ಅದೇ ಸ್ಥಳದಲ್ಲಿ. ಜೇಬಿನಲ್ಲಿದ್ದ ಚಿಲ್ಲರೆ ಕೊಟ್ಟು ಆಫೀಸಿಗೆ ಹೊರಟ. ಆ ಅಜ್ಜಿ ಥ್ಯಾಂಕ್ಸ್ , ಧನ್ಯವಾದಗಳು ಅಂತ ಹೇಳುವಷ್ಟು ಶಿಕ್ಷಿತವಾಗದಿದ್ದರೂ ತನ್ನ ಮುಗ್ಧ ಇಳಿ ಕಣ್ಣುಗಳಲ್ಲಿ ಅವನನ್ನು ಹರಸುತ್ತಾ. ನಡುಗುವ ಕೈಗಳನ್ನು ಮೇಲೆತ್ತಿ ವಂದಿಸುತ್ತಿದ್ದಳು.ಹೀಗೆ ೬ ತಿಂಗಳು ಕಳೆಯಿತು. ಪ್ರತಿದಿನ ರಮೇಶ ತನಗಾದಷ್ಟು ಅವಳಿಗೆ ದುಡ್ಡು ಕೊಟ್ಟು ಆಫೀಸಿಗೆ ಹೋಗುತ್ತಿದ್ದ.ಇವನಲ್ಲದೆ ಸುತ್ತಮುತ್ತಲಿನ ಜನ ಕೂಡ ತಮಗಾದಷ್ಟು ಸಹಾಯ ಮಾಡುತ್ತಿದ್ದರು.

ಅದಾಗಿ ಒಂದು ದಿನ ರಮೇಶ ಆಫೀಸಿಗೆ ಹೋಗುವಾಗ ಅಜ್ಜಿ ಕಾಣಲಿಲ್ಲ. ದಿನವೂ ಅವಳನ್ನು ನೋಡಿ ಒಂದಿಷ್ಟು ದುಡ್ಡು ಕೊಟ್ಟು ಹೋಗುತ್ತಿದ್ದ ಅವನಿಗೆ ಮನದಲ್ಲಿ ಅಂದು ಕಸಿವಿಸಿ. ಏಕೆ ಬಂದಿಲ್ಲ  ಅಂತ ಯೋಚಿಸುತ್ತಾ ಮುನ್ನೆಡೆದ. ಒಂದು ವಾರವಾದರೂ ಅಜ್ಜಿ ಸುಳಿವು ಇರಲಿಲ್ಲ.ಅಜ್ಜಿಗೆ ಏನಾಗಿರಬಹುದು ಎಂದು ಚಿಂತಿಸುತ್ತಾ ಅವಳನ್ನು ಹುಡುಕುತ್ತಾ ಹೊರಟ. ಹತ್ತಿರದಲಿದ್ದ  ಬೀಡಾ ಅಂಗಡಿಯಲ್ಲಿ ವಿಚಾರಿಸಿದಾಗ ಅವಳು ಹತ್ತಿರದ ಒಂದು ಸ್ಲಂ ವಾಸಿಯಾಗುರುವುದು ತಿಳಿದು ಬಂದಿತು.ಅದನ್ನು ಅರಸುತ್ತ ರಮೇಶ ಹೊರಟೇಬಿಟ್ಟ

ಸುಮಾರು ಅರ್ಧ ಘಂಟೆ ನಡೆದ ಮೇಲೆ ಅವನಿಗೆ ಗುಡಿಸಲು ಕಂಡವು. ಅಜ್ಜಿ ಅಲ್ಲಿಯೇ  ಯಾವುದೊ  ಗುಡಿಸಲಿನಲ್ಲಿ ಇರಬಹುದು ಎಂದು ಅಂದುಕೊಂಡ. ಹತ್ತಿರ ಹೋಗುತ್ತಿದ್ದಾಗ ಒಂದು ಗುಡಿಸಲು ಪಕ್ಕದಲಿ ಒಂದು ಪುಟ್ಟ ಅಂಗಡಿ ಇದ್ದಿದ್ದು ಕಂಡಿತು. ಅಜ್ಜಿ ಆ ಅಂಗಡಿಯಲ್ಲಿ ಇದ್ದಳು. ಅವಳನ್ನು ಕಂಡು ರಮೇಶನಿಗೆ ಸಮಾಧಾನವಾಯಿತು . ಕೊಡಲೇ ಅವಳನ್ನು ಮಾತನಾಡಿಸಲು ಹೊರಡುತ್ತಾನೆ.

” ಏನ್ ಅಜ್ಜಿ ಆ ಕಡೆ ಬಂದೇ ಇಲ್ಲಾ ?  ಭಿಕ್ಷೆ ಬೇಡೋದು ನಿಲ್ಸಿ ಬಿಟ್ಯಾ ?  ”  ಅಂದು ಕೇಳಿದಾಗ

” ಹೂಂ ಮಗಾ ೭೦ ವರ್ಷ ನಾನು ಸ್ವಾಭಿಮಾನದಿಂದಲೇ ಬದುಕಿದ್ದೆ. ಯಾರ ಹತ್ತಿರನು ಒಂದು ಹಿಡಿಗಾಸು ಇಸ್ಕೊಂಡವಳಲ್ಲ. ಹೆತ್ತ ಮಕ್ಕಳು ಬೀದಿಗೆ ಅಟ್ಟಿದಾಗ ದುಡಿಮೆಗೆ ಒಂದು ಕಾಸು ಇಲ್ಲದಾಗ ಬೇರೆ ವಿಧಿಯಿಲ್ಲದೇ ಭಿಕ್ಷೆ  ಬೇಡುತ್ತಿದ್ದೆ. ಸುಮಾರು ೬ ತಿಂಗಳುವರೆಗೆ ದಿನಾ ಬೆಳಿಗ್ಗೆಯಿಂದ ರಾತ್ರಿಯವರೆಗೆ ಮಳೆ, ಚಳಿ. ಗಾಳಿ ಎನ್ನದೇ ಭಿಕ್ಷೆ ಬೇಡಿದೆ. ನಿಮ್ಮಂಥ ಮಕ್ಕಳು ಸಹಾಯ ಮಾಡಿದ ಹಣವನ್ನು ಕೂಡಿಸುತ್ತ ಬಂದೆ. ಮೊನ್ನೆ ಲೆಕ್ಕ ಹಾಕಿ ಎಣಿಸಿದಾಗ

೩೦೧೫.೫೦ರೂ ಕೂಡಿದೆ. ಅದನ್ನೇ ಬಳಸಿಕೊಂಡು ಈ ಸಣ್ಣ ಡಬ್ಬಾ ಅಂಗಡಿ ಇಟ್ಟಿದ್ದೇನೆ. ಮಕ್ಕಳಿಗೆ ಚಾಕಲೇಟು , ದೊಡ್ಡವರಿಗೆ ಸಿಗರೇಟು , ಬಾಳೆಹಣ್ಣು ಇತ್ಯಾದಿ ಮಾರುತ್ತಾ ಇದೀನಿ ” ಎಂದು ನಿಟ್ಟುಸಿರಿಟ್ಟಳು.

ಇದನ್ನು ಕೇಳಿದ ರಮೇಶನಿಗೆ ದುಃಖ ಉಕ್ಕಿ ಬಂದಿತು. ಕಣ್ಣೀರಿಟ್ಟನು. ತನ್ನ ಮತ್ತು ಅಜ್ಜಿಯ ಬದುಕನ್ನು ಒಂದು ಕ್ಷಣ  ತುಲನೆ ಮಾಡಿ ,ಬದುಕನ್ನು ಒಂದು ಕ್ಷಣ ಶಪಿಸಿದನು. ಅಜ್ಜಿ ಅಂಗಡಿಯಲ್ಲಿ ಒಂದು ಬಾಳೆಹಣ್ಣು ತಿಂದು ಉಳಿದ ಎಲ್ಲ ಹಣ್ಣುಗಳನ್ನು ದುಡ್ಡು ಕೊಟ್ಟು ಖರೀದಿಸಿ ಹೊರಡುವ ಮುನ್ನ

” ಅಜ್ಜಿ ದುಡ್ಡು ಬೇಕಾದರೆ ಕೇಳು ” ಎಂದಾಗ

” ಬೇಡಪ್ಪ ಇನ್ಮುಂದೆ ಬೇಡಿ ತಿನ್ನಲ್ಲ ” ಎಂದು ಉತ್ತರಿಸಿದಳು.

ಅಜ್ಜಿಯ ವಯಸ್ಸಿಗೂ ಮೀರಿದ ಪ್ರಯತ್ನ, ತನ್ನ ಬದುಕಿನ ಮೇಲಿನ ಸ್ವಾಭಿಮಾನಕ್ಕೆ ಮನದಲ್ಲೇ ಸಲಾಂ ಹೊಡೆದು

ಆಫೀಸಿಗೆ ಹೊರಟ .

ಚಿತ್ರ ಕೃಪೆ : Google Images